Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 108 Hüküm no: 117 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varisi olmadan vefat eden Arnavut Çolak İbrahim’in terekesinin beytülmala gelir olarak kaydedildiği Kartal kasabasında sâkin Serdâr Mehmed b. İbrahim meclis-i şer‘-i hatîrde işbu bâ‘isü’l-vesîka Köle Hasan b. Ahmed mahzarında ikrâr ve takrîr-i kelâm edüp bundan akdem Rumeli’nde İlbasan ahâlîsinden olup Yalakâbâd Akkarye’de rençberlik vechi üzere sâkin iken fevt olan Arnavud Çolak İbrahim b. Abdullah’ın zâhirde vâris-i ma‘rûfu olmayup işbu mezbûr Hasan’ın zimmetinde yüz otuz guruş alacak hakkı olup ben dahi cânib-i beytülmal içün meblağ-ı mezkûru ahz murâd eylediğimde ol dahi meblağ-ı mezkûr içün Draman kurbünde biribirine muttasıl iki kıt‘a dut ve çavuş bağlarını bi-tarîkı’l-istiğlâli’l-âdî bana rehin vaz‘ etmişidi işbu târîh-i mezkûr Ağakapısı Beytülmali tarafından ağa mektûbu ile Kapıkethüdâsı Mehmed Ağa mübâşir ta‘yîn olunup meblağ-ı mezkûru ber-mûceb-i defter-i kassâm benden ahz ben dahi mezbûr Hasan’dan tamâmen ahz ü kabz eyledim fîmâ-ba‘d meblağ-ı mezkûr yüz otuz guruşdan mezbûr Hasan zimmetinde bir akçe ve bir habbe bâkī kalmayup vaz‘ eylediği istiğlâl hüccetini ba‘de’l-fek mezbûr Köle Hasan’ın yedine vaz‘ olunmağın mâ-hüve’l-vâki‘ bi’t-taleb ketb olundu. Fi’l-yevmi’r-Râbi‘ min-Saferi’l-hayr li-sene isnâ ve semânîn ve mi’ete ve elf. Şuhûdü’l-hâl: Kapıkethüdâsı Mehmed Ağa, Hancı Derviş Halil Beşe, Aşçı Hüseyin Beşe b. Veli, Hancı Süleyman Beşe, Nalband Halil Beşe, Ahmed Efendi, Nalband İbrahim Ağa.