Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 109 Hüküm no: 118 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçıbaşı Vakfı’nın mütevellisi Molla İbrahim’in vakfa ait olup yanan konağın tamirinden dolayı subaşına olan borcu ve sair harcamaları hakkında bilgi verdiği Mahmiye-i İslambol’da Draman’da sâkin Aşçıbaşı Vakfı’nın meşrûtiyet üzere mütevellîsi olan Molla İbrahim b. Halil nâm kimesne meclis-i şer‘de işbu bâ‘iseyü’l-vesîka Ahmed Ağa b. Veliyüddin ve Süleyman Ağa b. el-Hâc Mustafa Ağa mahzarlarında bi-tav‘ihi ikrâr ve takrîr-i kelâm edüp mütevellîsi olduğum vakf-ı mezkûrun medîne-i Üsküdar’a muzâfe Adalar nâhiyesine tâbi‘ Kartal kasabasında vâki‘ subaşı ağalara mahsûs icâr ile icâre olunan subaşı konağı bundan akdem kasaba-i mezbûrede bi-emrillâhi te‘âlâ zuhûr eden ihrâkdan konak-ı mezkûrun bir mikdârı hedm olunup ve ağa-yı mûmâ-ileyh emrimle min-haysü’l-mecmû‘ elli üç buçuk [guruş] harc ü sarf ve ta‘mîr eyleyüp benim de ağa-yı mezkûrânın zimmetlerinde yetmiş sekiz senesi Martı ibtidâsından Şa‘bân gāyetine değin bir senelik yirmi dört guruş icâr ve yetmiş dokuz senesi Martı ibtidâsından Şa‘bân gāyetine değin bir senelik otuz guruş icârım ki min-haysü’l-mecmû‘ elli dört guruş alacağımdan elli üç buçuk guruş harc ve masârıflarına bi’t-terâzî takās ve mahsûb onlar dahi mukāssa ve kabûl eyleyüp meblağ-ı bâkī zimmetlerinde olan yirmi paramı benim sinîn-i mezkûrînden senevî dörder yüz akçeden sekiz yüz akçe zemîn-i mukāta‘a deynim olup meblağ-ı bâkī yirmi parayı takās mâ‘adâ altı yüz kırk akçe zimmetimde vâcibü’l-edâ deynimdir dediği mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Şevvâli’l-mükerrem li-sene isnâ ve semânîn ve mi’ete ve elf. Şuhûdü’l-hâl: Serdâr Mehmed Beşe, el-Hâc Mahmud Beşe, Nalband İbrahim Beşe, Hüseyin Beşe b. Mehmed, Ahmed Efendi, Berber Mehmed Beşe, Hancı Süleyman Beşe, Berber Mehmed Beşe, Kara Ahmed Efendi.