Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 103 Hüküm no: 23 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın yarım hisse meyhanesini Yorgi v. Kiryazi ve Marine v. Kiryako’ya sattığı Mahrûse-i Galata’da Sultan Bayezid mahallesi sükkânından Mehmed Beşe b. Abdullah nâm mühtedî meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘iseyi’s-sifr Yorgi v. Kiryazi ve Marine v. Kiryako nâm zimmîler muvâcehelerinde ikrâr ve takrîr-i kelâm edip akd-i âtînin sudûruna değin nısf-ı şâyi‘i benim ve nısf-ı âharı li ebeveyn kız karındaşım Pilaşe bt. Kosta nâm nasrâniyenin mülkü olup mahalle-i mezbûrede vâki‘ bir tarafdan Hasan Ağa değirmeni ve bir tarafdan Moskov nâm zimmî mülkü ve iki tarafdan tarîk-i âm ile mahdûd ve üç bâb fevkānî oda ve tahtânî bir mahzen ve bir su kuyusunu müştemil meyhâneden nısf hisse-i şâyi‘amı cümle tevâbi‘ ve levâhıkı ile ve âmme-i hukūk ile mezbûrân Yorgi ve Marine’ye tarafeynden îcâb-ı kabûlü hâvî şurût-ı müfsideden ârî bey‘-i bâtt-ı sahîh-i şer‘î ile altı yüz kıt‘a esedî guruşa bey‘ ve teslîm edip anlar dahi ale’l-iştirâki’s-seviy iştirâ ve tesellüm ettiklerinden sonra semen-i mezbûr altı yüz kıt‘a esedî guruşu yedlerinden tamâmen ahz ve kabz eyledim min ba‘d zikr olunan meyhânenin nısf-ı şâyi‘i mezbûrân Yorgi ve Marine’nin ale’l-iştirâki’s-seviy mülk-i müşterâlarıdır keyfe mâ yeşâ’ân ve yahtârân mutasarrıfân olsunlar dedikde gıbbe’t-tasdîki’l-vicâhî ve’t-tahkīki’ş-şifâhî mâ hüve’l-vâki‘ bi’l-ibtigā ketb olundu. Fi’l-yevmi’s-sânî ve’l-ışrîn min Rebî‘ilâhir sene [10]77. Şuhûdü’l-hâl: Mustafa Efendi b. Musa el-İmâm, Mehmed Çelebi b. Rıdvan, Mehmed Çelebi b. Mustafa el-Hayyât, Mustafa Beşe b. Ahmed el-Hayyât, Mehmed Çelebi b. Abdullah el-Hakkâk, takyeci Mehmed Çelebi b. Ali.