Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 533 Hüküm no: 470 Orijinal metin no: [155a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Valide Sultan Vakfı mütevellisi Himmet Bey’in Ayşe Hatun bt. Abdullah’a ait Kumkapı’daki evin vakfa ait olduğu iddiası Budur ki, mahmiye-i Kostantıniyye’de vâki‘ merhûme ve mağfûrün-lehâ Safiye Vâlide Sultân -tâbet serâhâ- Hazretleri Evkāfı’na mütevellî olan Himmet Bey b. ( ) nâm bevvâb-ı sultânî meclis-i şer‘-i şerîf-i enverde işbu sâhibetü’l-kitâb Âişe Hatun bt. Abdullah mahzarında üzerine takrîr-i da‘vâ edip vakf-ı mezbûrdan olup mahmiye-i merkūmede Kumkapısı kurbünde ( ) mahallesinde vâki‘ bir tarafı Fâtıma Hatun mülkü ve bir tarafı Eğlence Hatun mülkü ve bir tarafı tarîk-i âm ve bir tarafı tarîk-i hâs ile mahdûd olup bir bâb fevkānî ve bir tahtânî beyti ve muhavvata ve kenîfi müştemil olan vakıf menzili mezbûre Âişe Hatun bî-vech zabt u tasarruf eder, menzil-i mezkûru vakıf için taleb ederim, suâl olunsun dedikde gıbbe’s-suâl merkūme Âişe Hatun cevâbında fi’l-hakīka menzil-i mezkûr seyyidim olup hâlâ Medîne-i Münevvere -sallallâhü te‘âlâ alâ-menevvirihâ-’de şeyhü’l-harem olan iftihârü’l-havâs ve’l-mukarrebîn ma‘denü’l-mülûk ve’s-salâtîn muhtâru ehli’l-izzi ve’t-temkîn Mehmed Ağa b. Abdulmuin’in mülk-i mahz-ı sahîhi olmağla menzil-i mezkûru cümle tevâbi‘ ve levâhıkıyla bin otuz senesi Cemâziyelâhire’sinin on birinci gününde bana hibe-i sahîha-i şer‘iyye ile hibe ve temlîk edip ben dahi ittihâb ve kabz ve temellük eylediğimde yedime hüccet-i şer‘iyye vermişdi, menzil-i mezkûr vech-i muharrer üzere vakıf olduğu ma‘lûmum değildir deyicek, mütevellî-i merkūmdan takrîrine muvâfık beyyine taleb olundukda ityân-ı beyyineden âciz olmağın mütevellî-i mezbûr mu‘ârazadan men‘ birle mâ-hüve’l-vâkı‘ bi’t-taleb ketb olundu. Fî-evâili Cemâziyelûlâ li-sene seb‘a ve selâsîn ve elf. Şühûdü’l-hâl: Fahrü’l-akrân Hüseyin Bey b. ( ) el-bevvâbü’s-sultânî, Ali Bey b. Abdullah el-bevvâbü’s-sultânî, Abdurrahman Bey b. Mehmed el-bevvâbü’s-sultânî.