Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 534 Hüküm no: 471 Orijinal metin no: [155a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Valide Sultan Vakfı mütevellisi Himmet Bey’in Mehmed Ağa b. Abdülmuin’e ait Kumkapı’daki evin vakfa ait olduğu iddiası Husûs-ı âti’t-takrîr şer‘le istimâ‘ olunmak için mahmiye-i Kostantıniyye’de Sarây-ı Atîk-i Sultânî ağası olan kıdvetü’l-havâs ve’l-mukarrebîn mu‘temedü’l-mülûk ve’s-selâtîn sâhibü’l-izzi ve’t-temkîn el-mahfûfu bi-sunûfi avâtifi’l-meliki’l-hakîm Hazret-i Abbas Ağa b. Abdülhalim huzûrunda akd-i meclis olundukda mahmiye-i mezbûrede vâki‘ merhûme ve mağfûrün-lehâ Safiye Vâlide Sultân -tâbet serâhâ- Hazretleri Vakfı’na mütevellî olan Himmet Bey b. ( ) nâm bevvâb-ı sultânî meclis-i şer‘de Medîne-i Münevvere’de şeyhü’l-harem olan iftihârü’l-havâs ve’l-mukarrebîn muhtâru ehli’l-izzi ve’t-temkîn Mehmed Ağa b. Abdülmuin muvâcehesinde takrîr-i da‘vâ edip vakf-ı mezbûrdan olup mahmiye-i mezbûrede Kumkapısı kurbünde ( ) mahallesinde vâki‘ bir tarafı Fâtıma Hatun mülkü ve bir tarafı Eğlence Hatun mülkü ve bir tarafı tarîk-i âm ve bir tarafı tarîk-i hâs ile mahdûd olup bir fevkānî ve bir tahtânî beyti ve muhavvata ve kenîfi müştemil olan vakıf menzili mûmâ-ileyh Mehmed Ağa bi-gayrı vech-i şer‘î zabt eder, menzil-i mezkûru vakıf için taleb ederim, suâl olunsun dedikde gıbbe’s-suâl mûmâ-ileyh Mehmed Ağa cevâbında fi’l-hakīka menzil-i mezkûru merhûme-i müşârun-ileyhâ hazretleri hâl-i sıhhatinde merhûm Ya‘kub Ağa b. Abdurrahman’a hibe-i sahîha-i şer‘iyye ile ve [hibe] ve temlîk edip ol dahi ittihâb ve kabz u kabûl eyledikden sonra menzil-i mezkûru merhûm-ı merkūm Ya‘kub Ağa dahi bana [155b] hibe-i sahîha-i şer‘iyye ile hibe ve temlîk edip ben dahi vech-i muharrer üzere ittihâb ve kabz u kabûl ve temellük etmiş idim, menzil-i mezkûrun vakfiyeti ma‘lûmum değildir deyicek, mütevellî-i mezbûrdan takrîrine muvâfık beyyine taleb olundukda ityân-ı beyyineden âciz olmağın ba‘de’t-tahlîfi’ş-şer‘î mütevellî-i mezbûr mu‘ârazadan men‘ olunup mâ-hüve’l-vâkı‘ bi’t-taleb ketb olundu. Fî-evâhiri Rebî‘i’l-âhir sene seb‘a ve selâsîn ve elf. Şühûdü’l-hâl: Umdetü’l-havâs ve’l-mukarrebîn İsmail Ağa b. Abdülkerim an-Ağayân-ı Sarây-ı Cedîd sâbıkan, mefharü’l-emâsil ve’l-akrân Mehmed Ağa b. Kethüdâ Ağa Sarây-ı Atîk, Ahmed Ağa b. Abdullah el-bevvâb, Hüseyin Bey b. Abdullah el-bevvâb, Abdurrahman Bey b. Mehmed el-bevvâb, Ali Bey b. Abdullah el-bevvâb, Hasan Bey b. A[bdullah] el-bevvâb ve gayruhüm.