Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 535 Hüküm no: 472 Orijinal metin no: [155b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı câbîsi Ali Çelebi b. Hızır’ın vakfa borcunun olmadığı Mahmiye-i Kostantıniyye’de vâki‘ Medîne-i Münevvere Evkāfı’na câbî olan Ali Çelebi b. Hızır meclis-i şer‘-i şerîf-i enverde vakf-ı mezbûr mütevellîsi olan fahrü’l-akrân Ömer Bey b. Mustafa nâm cündî mahzarında takrîr-i kelâm edip bin otuz dört senesi Muharremü’l-harâmı gurresinden sene-i mezkûre Cemâziyelâhire’si evâsıtına gelince zikr olunan vakfın akārâtı icâresinden cem‘ ve tahsîl olunan meblağı bi’t-tamâm mütevellî-i müşârun-ileyh Ömer Ağa’ya teslîm eyleyip zimmetimde bir akçe bâkī kalmamış iken zimmetimde târîh-i merkūmda bin otuz altı bin üç yüz kırk akçe bâkīdir deyu müfettiş-i sâbık Ahmed Efendi bilâ-vech-i şer‘î sicill-i mahfûza meblağ-ı mezbûru kayd etmişdir, vâki‘ hâl mütevellî-i müşârun-ileyh Ömer Ağa’dan suâl olunup takrîri tahrîr olunmak matlûbumdur dedikde gıbbe’s-suâl mütevellî-i müşârun-ileyh Ömer Ağa cevâbında fi’l-hakīka câbî-i mersûm Ali Çelebi târîh-i merkūmda vakf-ı merkūm icârâtından cem‘ ve tahsîl eylediği mâl-ı vakfı bi’t-tamâm bana teslîm edip ben dahi kabz ve tesellüm eyledim, câbî-i mersûm zimmetinde vakf-ı mezbûr mâlından bir akçe bâkī kalmadı ve müfettiş-i sâbık-ı mezkûr Ahmed Efendi’nin sicill-i mahfûza kayd eylediği meblağ-ı mezbûr otuz altı bin üç yüz kırk akçenin aslı yokdur deyicek, mütevellî-i müşârun-ileyhin takrîri câbî-i mersûm taleb ile ketb olundu. Tahrîren fî-evâili şehri Ramazâni’l-mübârek li-sene sitte ve selâsîn ve elf. Şühûdü’l-hâl: Mustafa Çelebi b. ( ) el-câbî, İbrahim Bey b. Mustafa el-câbî, Ali Bey b. Abdullah el-bevvâbü’s-sultânî, Mehmed Çelebi b. ( ) el-bevvâbü’s-sultânî ve gayruhüm mine’l-hâzırîn.