Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 536 Hüküm no: 473 Orijinal metin no: [155b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer Bey b. Abdülvehhab’ın Medine-i Münevvere Vakfı’na ait el-Hac Hasan mahallesindeki evin kiracısı olduğu İşbu sâhibü’l-kitâb Sefer Bey b. Abdülvehhab nâm kimesne meclis-i şer‘-i hatîr-i lâzımü’t-tevkīre gelip takrîr-i kelâm edip mahmiye-i Kostantıniyye’de el-Hâc Hasan mahallesinde sâkine iken vefât eden merhûme Şevki Hatun bt. Abdullah silk-i mülkünde münselik olup mahalle-i merkūmede vâki‘ bir tarafı ( ) nâm Hatun mülkü ve iki tarafı Medîne-i Münevvere Vakfı ve bir tarafı tarîk-i âm ile mahdûd fevkānî bir bâb oda ve bir sofa ve bir matbah ve bi’r-i mâ ve kenîf ve muhavvatayı müştemil olan mülk menzilini cümle tevâbi‘ ve levâhıkı ile mezbûre Şevki Hatun hâl-i hayât ve kemâl-i sıhhatinde vakf ve habs edip süknâsını evvelâ nefsine ve sâniyen Medîne-i Münevvere fukarâsına şart edip hâlâ mezbûre Şevki Hatun vefât etmekle menzil-i mezkûr Medîne-i Münevvere fukarâsına intikāl etmeğin mahmiye-i mezbûrda Medîne-i Münevvere mütevellîsi olan fahrü’l-emâsil ve’l-akrân İsmail Çelebi b. Mehmed menzil-i mezkûru ba‘de’l-müzâyede iki bin akçe icâre-i mu‘accele ve yevmî bir akçe icâre-i müeccele ile bana îcâb edip ben dahi [156a] istîcâb ve kabûl eylediğimde menzil-i mezkûrun zabt u tasarrufu için mütevellî-i müşârun-ileyh İsmail Çelebi târîh-i kitâb şehri evâhiri ile müverrah hatem ve imzâsını müştemil yedime tezkire vermişdi, el-hâletü hâzihî tezkire-i mezbûreye nazar olunup mûcebince savb-ı şer‘den dahi hüccet-i şer‘iyye verilmek matlûbumdur dedikde mûmâ-ileyh Sefer Bey yedinde olan mütevellî müzekkiresine nazar olunup mazmûnu takrîrine muvâfık bulunmağın mâ-hüve’l-vâkı‘ bi’t-taleb ketb olundu. Fî-evâhiri Cemâziyelûlâ li-sene seb‘a ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Mahmud Efendi b. ( ) el-kādî, Ali Bey b. Abdullah el-bevvâbü’s-sultânî, Mahmud Efendi b. Muharrem el-mülâzım, muharrirü’l-hurûf Hasan Efendi b. Abdünnebî el-Kādî ve gayruhüm.