Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 540 Hüküm no: 479 Orijinal metin no: [157a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı mütevellisi İsmail Çelebi’nin Kirmasti mahallesinden Fatma Hatun tarafından vakfedilen evi teslim alması Mahmiye-i Kostantıniyye’de vâki‘ Medîne-i [Münevvere] -sallallâhü te‘âlâ alâ-münevvirihâ- Evkāfı’na mütevellî olan mefharü’l-emâsil ve’l-akrân İsmail Çelebi b. Mehmed meclis-i şer‘-i şerîf-i şâmihü’l-imâdda takrîr-i kelâm ve ta‘bîr ani’l-merâm edip vakf-ı mezbûrdan olup mahmiye-i merkūmede Kirmasti mahallesinde vâki‘ bir tarafı Fâtıma Hatun mülkü ve bir tarafı tarîk-i âm ve bir tarafı Mehmed Efendi b. ( ) mülkü ve bir tarafı tarîk-i hâs ile mahdûd iki bâb fevkānî odayı ve ahırı ve bi’r-i mâ ve kenîfi ve cüneyneyi müştemil olan menzile icâre-i mu‘accele ve müeccele ile müste’ciresi olan mezbûre Fâtıma Hatun bt. ( ) fevt olup evlâdı olmamağla menzil-i mezkûr vakfa âid olmuşdur, savb-ı şer‘den üzerine varılıp keşf olunmak matlûbumdur dedikde kıbel-i şer‘den Mevlânâ Hasan Efendi b. ( ) irsâl olunup zeyl-i sütûrda isimleri mastûr olan Müslimîn ve hâssa mi‘mârlardan Üstâd Ali Çelebi b. Halil ile menzil-i mezkûrun üzerine varılıp keşf ve mesâha ettiklerinde fi’l-hakīka menzil-i mezkûrun bennâ zirâ‘ıyla tûlen elli dört ve arzen on üç zirâ‘ bâ-hesâb-ı şatrancî yedi yüz iki zirâ‘ arsası olduğunu ta‘yîn ve ittifâk ettiklerinde vâki‘ hâli mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Fî-evâhiri Cemâziyelûlâ li-sene seb‘a ve selâsîn ve elf. Şühûdü’l-hâl: Mustafa Çelebi b. ( ) el-kâtib, Ali Çelebi b. Hızır el-câbî, İbrahim Bey b. Mustafa, İbrahim Beşe b. Abdullah ve gayruhüm.