Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 103 Hüküm no: 24 Orijinal metin no: [3b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın yarım ev hissesini, Yorgi ve Marine veledey Kiryako’ya sattığı Mahrûse-i Galata’da Sultan Bayezid mahallesi sükkânından Mehmed Beşe b. Abdullah nâm mühtedî meclis-i şer‘de bâ‘iseyi’s-sifr Yorgi ve Marine veledey Kiryako nâm zimmîler mahzarlarında ikrâr ve takrîr-i kelâm edip mahalle-i mezbûrede vâki‘ bir tarafdan Haci Drako veresesi mülkleri ve bir tarafdan Haci Mihayil mülkü ve bir tarafdan mezbûre Marine mülkü ve bir tarafdan tarîk-i âm ile mahdûd fevkānî iki bâb oda ve bir sofa ve bir su kuyusu ve bir mahzeni müştemil olup akd-i âtînin sudûruna değin nısf-ı şâyi‘i benim ve nısf-ı şâyi‘-i âharı li ebeveyn kız karındaşım Pilaşe bt. Kosta nâm nasrâniyenin mülkü olan menzilden nısf hisse-i şâyi‘amı cümle tevâbi‘i ve levâhıkı ile mezbûrân Yorgi ve Marine’ye tarafeynden îcâb ve kabûlü [hâvî ve] şurût-ı müfsideden ârî bey‘-i bâtt-ı sahîh-i şer‘î ile altı yüz kıt‘a esedî guruşa bey‘ ve teslîm edip anlar dahi [4a] ale’l-iştirâki’s-seviy iştirâ ve tesellüm ettiklerinden sonra semen-i mezbûr altı yüz kıt‘a esedî guruşu yedlerinden tamâmen ahz u kabz eyledim min ba‘d menzil-i mezkûrun nısf-ı şâyi‘i merkūmân Yorgi ve Marine’nin ale’l-iştirâki’s-seviy mülk-i müşterâlarıdır keyfe mâ yeşâ’ân ve yahtârân mutasarrıfân olsunlar dedikde gıbbe’t-tasdîki’l-vicâhî ve’t-tahkīki’ş-şifâhî mâ hüve’l-vâki‘ ketb olundu. Fi’l-yevmi’s-sânî ve’l-ışrîn min Rebî‘ilâhir li sene [10]77. Şuhûdü’l-hâl: Es-Sâbikūn.