Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 540 Hüküm no: 480 Orijinal metin no: [157b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. Abdullah’ın Vezir Cafer Paşa tarafından vakfedilip Medine-i Münevvere Evkafı’na intikal eden evi kiralaması İşbu râfi‘ü’l-kitâb fahrü’l-akrân Mustafa Bey b. Abdullah nâm bevvâbü’s-sultânî meclis-i şer‘-i şerîf-i enverde takrîr-i kelâm edip mahmiye-i Kostantıniyye’de Kadırga Limanı kurbünde Fethiye Câmi‘i mahallesinde ( ) demekle ma‘rûf mahallede sâkin iken vefât eden merhûm Vezîr Ca‘fer Paşa hâl-i hayâtında mahalle-i mezbûrede vâki‘ muhavvata-i hâriciyyesinde ve muhavvata-i dâhiliyyesinde büyût-ı müte‘addideyi müştemil inde’l-cîrân ma‘lûmü’l-hudûd olan mülk sarâyını vakf ve habs edip süknâsını evvelâ kendi nefsine ve sâniyen muhavvata-i dâhiliyyesini zevcesine ve muhavvata-i hâriciyyesini evlâdına, ba‘dehüm Medîne-i Münevvere fukarâsına vakf etmekle vâkıf-ı mûmâ-ileyhin evlâdından fahrü’l-akrân Mehmed Bey’in meşrûtiyyet üzere mutasarrıf olduğu mezkûr muhavvata-i hâriciyyeden bir tarafı Üstâd Mahmud Vakfı ve bir tarafı Ali Bey ve Hadice Hatun bt. Bîzebân Ağa mülkleri ve bir tarafı sarây-ı mezkûr ve tarîk-i âm ile mahdûd olup tûlen ve arzen bâ-hesâb-ı şatrancî yedi yüz yirmi dokuz zirâ‘ arsa üzerinde üç bâb fevkānî odaları ve fırın ve matbah ve ahır ve bi’r-i mâ ve kenîf ve sâhayı müştemil olan vakıf menzil harâba müşrif olup merkūm Mehmed Bey ta‘mîrine kādir olmamağla menzil-i mezkûrun süknâsını vakf-ı mezbûra teberru‘ ve teslîm edip vakf-ı mezbûr mütevellîsi olan mefharü’l-emâsil ve’l-akrân İsmail Çelebi b. Mehmed dahi tesellüm eyledikden sonra mütevellî-i müşârun-ileyh menzil-i mezkûru dört bin akçe icâre-i mu‘accele ve yevmî bir akçe icâre-i müeccele ile bana îcâr edip ben dahi istîcâr ve kabûl eylediğimde menzil-i mezkûrda kendi mâlımdan icâre-i mu‘acceleme mahsûb olmak üzere binâya izin birle mütevellî-i mûmâ-ileyh hatem ve imzâsını müştemil târîh-i kitâb şehri evâhiri ile müverrah yedime tezkire vermişdi, el-hâletü hâzihî tezkire-i mezbûreye nazar olunup mûcebince savb-ı şer‘den dahi hüccet-i şer‘iyye verilmek matlûbumdur dedikde mûmâ-ileyh Mustafa Bey’in yedinde olan tezkire-i merkūmeye nazar olunup mazmûnu takrîrine muvâfık bulunmağın mâ-hüve’l-vâkı‘ bi’t-taleb ketb olundu. Hurrire fî-evâhiri Cemâziyelâhire sene seb‘a ve selâsîn ve elf. Şühûdü’l-hâl: İbrahim Çelebi b. İsa el-mülâzım, eş-Şeyh Mehmed Efendi b. ( ), Abdi Efendi b. Hasan el-imâm, Muharrem b. Hasan el-müezzin, Muharrem b. Ramazan, Hüseyin Çavuş b. Abdullah, Ali Bey b. Abdullah ve gayruhüm.