Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 541 Hüküm no: 481 Orijinal metin no: [157b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun bt. Mehmed’in Medine-i Münevvere Evkafı’na ait el koyduğu evdeki hissenin babasından intikal etmiş olduğu Dârü’s-saltanati’s-seniyye Kostantıniyyeti’l-mahmiye’de Medîne-i Münevvere -şerrefehallâhü te‘âlâ fi’d-dünyâ ve’l-âhire- Evkāfı’na bi’l-fi‘il mütevellî olan mefharü’l-emâsil ve’l-akrân İsmail Çelebi b. Mehmed meclis-i şer‘-i şerîf-i enverde işbu râfi‘atü’l-kitâb Rahime Hatun bt. Mehmed tarafından husûs-ı âti’l-beyâna vekîl olup vekâleti nehc-i şer‘î-i mu‘teber üzere sâbite olan zevci fahrü’l-akrân Ali Çelebi b. ( ) mahzarında takrîr-i kelâm edip vakf-ı mezbûrdan olup mahmiye-i mezbûrede Baklalı demekle ma‘rûf Abdullah Ağa mahallesinde vâki‘ bir tarafı merhûm Abdi Çelebi veresesi mülkü ve bir tarafı Langa Bostanı ve bir tarafı sulehâya meşrût vakıf menzil ve bir tarafı tarîk-i âm ile mahdûd olup muhavvata-i dâhiyesi bir bâb fevkānî odayı ve kîlârı ve iki sofa ve dahlîz ve bir bâb tahtânî oda ve matbah ve iki kenîf ve cüneyneyi ve muhavvata-i hâriciyyesi bir bâb fevkānî odayı ve ahırı müştemil bennâ zirâ‘ıyla tûlen elli zirâ‘ ve arzen yirmi yedi buçuk zirâ‘ bâ-hesâb-ı şatrancî bin üç yüz yetmiş beş zirâ‘ arsası olan vakıf menzilin icâre-i mu‘accele ve yevmî bir buçuk akçe icâre-i müeccele ile müste’ciri olan Mehmed Çelebi b. ( ) fevt olup menzil-i mezkûrun nısfı bi-hasebi’l-kānûn sulbî oğlu Ali Çelebi’ye ve nısf-ı âharı sulbiye kızı Fâtıma[‘ya] intikāl eyledikde mezbûre Fâtıma dahi vefât edip evlâdı kalmamağın zikr olunan nısf hissesi vakfa âid olmuşdu, hâlâ müvekkile-i mezbûre Rahime Hatun menzil-i mezkûrun sülüs hissesine bilâ-vech-i şer‘î vaz‘-ı yed edip vâki‘ hâl vekîl-i mezbûrdan suâl olunmak matlûbumdur dedikde gıbbe’s-suâl vekîl-i mezbûr cevâbında fi’l-hakīka müvekkilem mezbûre Rahime Hatun dahi müteveffâ-yı mesfûr Mehmed Çelebi’nin sulbiye kızıdır, ol vech üzere menzil-i mezkûrun sülüs hissesine vaz‘-ı yed eder deyicek, gıbbe’l-istintâk akībe’l-inkâr vekîl-i mezbûrdan takrîrine muvâfık beyyine taleb olundukda udûl-ı müslimînden Rıdvan Efendi b. Abdullah el-müezzin ve Süleyman Ağa b. Abdülmennan nâm kimesne[ler] li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müvekkile-i mezbûre Rahime Hatun müteveffâ-yı mezbûr Mehmed Çelebi’nin sulbiye kızıdır, husûs-ı mezbûra biz şâhidleriz, şehâdet dahi ederiz deyu edâ-i şehâdet-i şer‘iyye ettiklerinde ba‘de ri‘âyeti [158a] şerâiti’l-kabûl şehâdetleri makbûle olmağın mûcebiyle hükm olunup mâ-hüve’l-vâkı‘ bi’t-taleb ketb olundu. Fî-evâili Recebi’l-ferd li-sene seb‘a ve selâsîn ve elf. Şühûdü’l-hâl: Mehmed Efendi b. Hızır el-imâm, Abdüllatif Çelebi b. Ramazan el-bevvâbü’s-sultânî, Mehmed Bey b. Abdullah es-serrâcü’s-sultânî, İlyas Halîfe b. Hızır el-kayyim, Mehmed Beşe b. ( ) er-râcil, Hüseyin Çelebi b. Hüsrev er-râcil, Yusuf Ağa b. Abdullah, Mustafa Çelebi b. ( ) el-kâtib, Ali Çelebi b. Hızır el-câbî ve gayruhüm.