Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 542 Hüküm no: 482 Orijinal metin no: [158a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. II. Osman’ın dayesi Havva Hatun’un vakfettiği altınları için Hüseyin Bey b. Ahmed’e vekalet vermesi Dârü’s-saltanati’s-seniyye Kostantıniyyeti’l-mahmiye’de Sarây-ı Atîk’de sâkin merhûm ve mağfûrün-leh es-Sultân Osman Hân Hazretleri’nin dâyesi olan Havvâ Hatun bt. Abdullah tarafından husûs-ı âti’l-beyâna vekîl olup vekâleti nehc-i şer‘î-i mu‘teber üzere sâbite olup sarây-ı merkūm ağası olan kıdvetü’l-havâs ve’l-mukarrebîn mu‘temedü’l-mülûk ve’s-selâtîn sâhibü’l-izzi ve’t-temkîn el-mahfûfu bi-sunûfi avâtifi’l-meliki’l-hakîm Abbas Ağa b. Abdülhalim meclis-i şer‘de sarây-ı mezbûr teberdârânından işbu râfi‘ü’l-kitâb Hüseyin Bey b. Ahmed mahzarında bi’l-vekâle takrîr-i kelâm edip ve ta‘bîr ani’l-merâm edip müvekkilem müşârun-ileyhâ Havvâ Hatun bundan akdem vakf ve habs edip hâlâ Medîne-i Münevvere -sallallâhü te‘âlâ alâ-münevvirihâ-’de hücre-i mutahharada şeyhü’l-harem yediyle vaz‘ olunan bin aded altını mezbûr Hüseyin Bey kabz ve vakf-ı mezbûra mütevellî ta‘yîn ettiği nâib-i şeyhü’l-harem olan Mustafa Ağa b. Abdurrahman’a teslîm edip mûmâ-ileyh Mustafa Ağa dahi meblağ-ı mezbûr ile akār iştirâ edip hâsıl olan îcâresinden mütevellî ve kâtib ve câbî vezâifinden bâkī meblağ ile mütevellî-i mûmâ-ileyh ravza-i mutahharada Kur’ân-ı azîmü’ş-şândan her gün eczâ-i şerîfe tilâvet ettirmek için müvekkilem mûmâ-ileyhâ tarafından mesfûr Hüseyin Bey vekîl ve menâbına nâib nasb eyledi dedikde mesfûr Hüseyin Bey dahi vekâlet-i mezbûreyi kabûl ve hizmet-i lâzımesini edâya müte‘ahhid olmağın mâ-hüve’l-vâkı‘ ketb olundu. Fî-evâili Recebi’l-ferd sene seb‘a ve selâsîn ve elf. Şühûdü’l-hâl: İbrahim Bey b. Mustafa Teberdâr-ı sarây el-mezbûr, Ömer Bey b. Abdurrahman Teberdâr-ı Sarây el-mezbûr, fahrü’l-eşbâh Kasım Bey b. ( ) el-bevvâbü’s-sultânî ve gayruhüm.