Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 543 Hüküm no: 483 Orijinal metin no: [158a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı mütevellisi İsmail Çelebi’nin İplikçi Hüma Hatun tarafından vakfedilen evi teslim alması Mahmiye-i Kostantıniyye’de vâki‘ Medîne-i Münevvere -sallallâhü te‘âlâ alâ-münevvirihâ- Evkāfı’na mütevellî olan fahrü’l-emâsil ve’l-akrân İsmail Çelebi b. Mehmed meclis-i şer‘-i hatîr-i lâzımü’t-tevkīrde takrîr-i kelâm edip mahrûsa-i Galata’ya tâbi‘ Kasımpaşa mahallâtından Sururi Çelebi mahallesinde sâkine iken vefât eden merhûme İplikçi Hüma Hatun hâl-i hayâtında ve kemâl-i sıhhatinde mahalle-i mezbûrede bir tarafı Bîzebân Ağa mülkü ve iki tarafı tarîk-i hâs ve bir tarafı Debbâğ Muslı Çelebi mülkü ile mahdûd olup dört bâb fevkānî odaları ve bi’r-i mâ’î ve kenîfi ve cüneyneyi müştemil olan mülk menzilini vakf ve habs edip vakfiye-i ma‘mûlün-bihâsında evvelâ süknâsını nefsine, ba‘dehâ evlâdına şart ve ba‘de’l-inkırâz Medîne-i Münevvere fukarâsına ta‘yîn etmişidi, el-hâletü hâzihî evlâddan menzil-i mezkûra mutasarrıf olan Mustafa b. Mehmed Reîs fevt olup mârru’z-zikr menzil vakf-ı şerîfe âid oldu, savb-ı şer‘den üzerine varılıp keşf ve tahrîr olunmak matlûbumdur dedikde kıbel-i şer‘den Mevlânâ Hasan Efendi ve hâssa mi‘mârlardan Üstâd Ali Çelebi b. Halil irsâl olunup zeyl-i sütûrda isimleri mastûr olan Müslimîn ile üzerine vardıklarında mu‘âyene edip fi’l-hakīka menzil-i mezkûrun bennâ zirâ‘ıyla tûlen yirmi altı zirâ‘ ve arzen yirmi üç zirâ‘ bâ-hesâb-ı şatrancî altı yüz otuz sekiz zirâ‘ arsası olduğunu ittifâk ettiklerinde vâki‘ hâl mevlânâ-yı mezbûr mahallinde tahrîr ba‘dehû meclis-i şer‘de gelip inhâ ve takrîr etmeğin mâ-hüve’l-vâkı‘ bi’t-taleb ketb olundu. Hurrire fî-evâhiri Şa‘bâni’l-mu‘azzam sene seb‘a ve selâsîn ve elf. Şühûdü’l-hâl: Ali Çelebi b. Hızır el-câbî, Mustafa Çelebi b. ( ) el-cündî, İbrahim Bey b. Mustafa el-bevvâb, Ali Bey b. Abdullah el-bevvâb ve gayruhüm mine’l-hâzırîn.