Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 543 Hüküm no: 484 Orijinal metin no: [158b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Vakfı’na ait Hatice Sultan mahallesindeki evin kiracısı Abdi Beşe b. Ali’nin evi tamir ettirmesi Mahmiye-i Kostantıniyye’de Hadice Sultân mahallesinde Medîne-i Münevvere Vakfı’ndan olup bir tarafı mahalle-i mezbûre mescidi müezzinine meşrût vakıf menzil ve bir tarafı Hasan Çelebi b. Mehmed mülkü ve bir tarafı Muslı Çelebi b. ( ) mülkü ve bir cânibi tarîk-i âm ile mahdûd olup bir bâb tahtânî odayı müştemil olan vakıf menzilin icâre-i mu‘accele ve müeccele ile müste’ciri olan Abdi Beşe b. Ali nâm râcil meclis-i şer‘-i şerîf-i enverde takrîr-i kelâm edip vech-i muharrer üzere mutasarrıf olduğum menzil-i mezbûr mürûr-ı eyyâm ile harâbe, kābil-i intifâ‘ olmamağla icâre-i mu‘acceleye mahsûb olmak üzere menzil-i mezbûru kendi mâlımdan ta‘mîre vakf-ı merkūm mütevellîsi izin vermişdi, el-hâletü hâzihî savb-ı şer‘den üzerine varılıp keşf ve nıkzının kıymeti tahmîn olunmak matlûbumdur dedikde kıbel-i şer‘den Mevlânâ Hasan Efendi b. Abdünnebî irsâl olunup ol dahi hâssa mi‘mârlarından Üstâd Ali Çelebi b. Halil ve zeyl-i sütûrda isimleri mastûr olan Müslimîn ile üzerine varıp keşf ve mu‘âyene ve mesâha ettiklerinde fi’l-hakīka menzil-i mezbûrun bennâ zirâ‘ıyla tûlen on dokuz zirâ‘ on sekiz isbi‘ ve arzen dokuz zirâ‘ hesâb-ı şatrancî üzere yüz yetmiş sekiz zirâ‘ arsası ve nıkzının iki bin akçeye kıymeti mütehammil olduğunu tahmîn ve ta‘yîn ve ittifâk ettiklerini mevlânâ-yı mezbûr mahallinde tahrîr, ba‘dehû gelip meclis-i şer‘de inhâ ve takrîr etmeğin menzil-i mezbûrda vech-i mübeyyen üzere kendi mâlıyla binâ ihdâsına mesfûr Abdi Beşe’ye izin verilmeğin mâ-hüve’l-vâkı‘ bi’t-taleb ketb olundu. Hurrire fî-evâsıtı Zilka‘deti’ş-şerîfe li-sene seb‘a ve selâsîn ve elf. Şühûdü’l-hâl: Kıdvetü’l-müderrisîn Abdurrahman Efendi, Mustafa Efendi b. Abdünnebî el-kâtib, Ali Çelebi b. Mehmed el-yesârî, İbrahim Bey b. Mehmed Ser-nakkāş, Mahmud b. Abdullah Berber, Musa Ağa b. Mustafa el-müteferrika, Halil Efendi b. Mustafa el-imâm, Ya‘kub Halîfe b. Siyami el-müezzin, Mustafa Beşe b. Abdullah Sakā-i hâssa, Bekir b. Mehmed, Hasan Ağa b. ( ) el-cündî, Mehmed b. İsmail, Mehmed b. Üveys ve gayruhüm.