Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 544 Hüküm no: 485 Orijinal metin no: [158b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Ayasofya Vakfı mütevellisi İbrahim Bey b. Hanefi’nin camiye gelen suya engel olunmamasını istemesi Mahmiye-i Kostantıniyye’de Küçük Ayasofya Vakfı’na mütevellî olan İbrahim Bey b. Hanefi meclis-i şer‘-i hatîr-i lâzımü’t-tevkīrde mahmiye-i mezbûrede Medîne-i Münevvere -sallallâhü te‘âlâ alâ-münevvirihâ- Evkāfı’na mütevellî olan fahrü’l-akrân İsmail Çelebi b. Mehmed muvâcehesinde takrîr-i da‘vâ edip bundan akdem zikr olunan Küçük Ayasofya mahallesinde inde’l-cîrân ma‘lûmü’l-hudûd olan mülk menzilini Hadice Hatun bt. Handan Ağa’dan iştirâ eyledikde menzil-i mezkûru mezbûre Hadice Hatun vakf edip süknâsını nefsine, ba‘de vefâtihâ Medîne-i Münevvere fukarâsına şart edip hâlâ mezbûre Hadice Hatun vefât etmekle menzil-i mezkûru mütevellî-i merkūm İsmail Çelebi zabt edip mütevellîsi olduğum mârru’z-zikr Küçük Ayasofya Câmi‘i suyu menzil-i mezkûrdan mürûr etmeğin menzil-i mezkûrda zikr olunan sunun üzerinde vâkıfe-i mezbûre fuzûlen baca açıp suyunu gasb etmişdir, vâki‘ hâl mütevellî-i merkūm İsmail Çelebi’den suâl olunup men‘ olunmak matlûbumdur dedikde gıbbe’s-suâl mütevellî-i merkūm İsmail Çelebi cevâbında fi’l-hakīka vâkıfe-i mezbûreden mukaddem mersûm Handan Ağa yedinden sâbıkā Küçük Ayasofya Vakfı’na mütevellî olan Mehmed Bey b. Abdullah nâm kimesne vakf-ı mezbûr için yedi bin akçemi alıp kabz eyledikden sonra zikr olunan sunun tasarrufuna izin verdi deyicek, gıbbe’l-istintâk ve’l-inkâr mütevellî-i merkūm İsmail Çelebi’den takrîrine muvâfık beyyine taleb olundukda mahalle-i mezbûrede sâkin udûl-ı Müslimînden fahrü’l-a‘yân Receb Çelebi b. Abdülmennan el-Kâtib ve Mehmed Bey b. Ramazan el-Cündî nâm kimesneler li-ecli’ş-şehâde meclis-i şer‘a hâzırân olup isre’l-istişhâdi’ş-şer‘î fi’l-vâki‘ mütevellî-i sâbık mezbûr Mehmed Bey mukaddemâ mersûm Handan Ağa’dan bizim huzûrumuzda vakf-ı mezbûr için yedi bin akçeyi alıp kabz edip zikr olunan sunun tasarrufuna mersûm Handan Ağa’ya izin verdi, husûs-ı mezbûra biz şâhidleriz, şehâdet dahi ederiz deyu edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri makbûle olmağın mâ-hüve’l-vâkı‘ bi’t-taleb ketb olundu. Hurrire fî-evâili şehri Recebi’l-ferd li-sene seb‘a ve selâsîn ve elf. Şühûdü’l-hâl: Fahrü’l-akrân Yusuf Ağa b. ( ) el-müteferrika, Mustafa Çelebi b. ( ) el-kâtib, Ali Bey b. Abdullah el-bevvâbü’s-sultânî, Dilaver Bey b. Abdullah el-bevvâb.