Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 545 Hüküm no: 486 Orijinal metin no: [159a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülbendçi Hasan mahallesinden Serkiz v. Satan ile eşi Maryem’in komşuları tarafından evlerine yapılan eklentilerin zararlarının engellenmesini istemeleri Mahmiye-i Kostantıniyye’de Dülbendçi Hüsam mahallesinde sâkin Serkiz v. Satan ve zevcesi Maryem bt. Ragoşa nâm Ermeniler meclis-i şer‘-i şerîf-i enverde takrîr-i kelâm ve ta‘bîr ani’l-merâm edip mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd olup ber-vech-i iştirâk mutasarrıf olduğumuz mülk menzilimizin evi yanı duvarı kadîmü’l-eyyâmdan câr-ı mülâsıkımız olan Hadice Hatun bt. Abdullah sâkine olduğu menzilin duvarı ile ma‘an isti‘mâl olunagelmişdi, el-hâletü hâzihî mezbûrenin zevci olan fahrü’l-akrân Mehmed Çavuş b. Abdullah zevcem mezbûre Hadice Hatun’un hamâmının suyolu duvar-ı mezkûrdan boru ile mürûr eder deyu bilâ-vech-i şer‘î mu‘âraza edip menzilimizin içine nâzır pencere ve mukaddem altı parmak kaygan saçaklardan ziyâde on sekiz parmak saçak ihdâs etmekle üzerimize havâle olup bize küllî zarar olmuşdur, kıbel-i şer‘den üzerine varılıp mu‘âyene ve keşf olunmak matlûbumdur dediklerinde savb-ı şer‘den Mevlânâ Hasan Efendi b. Abdünnebî irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i sütûrda isimleri mastûr olan Müslimîn ile üzerine varıp mu‘âyene ettiklerinde fi’l-hakīka mezbûrân Serkiz ve Maryem’in menzilinin duvarı ve sakfı temelinden an-aslin kadîmü’l-eyyâmdan merkūme Hadice Hatun’un menzili duvarına muttasıl olup ve zikr olunan suyolu meremmete muhtâc olduğu mezbûrânın evi içinden ta‘mîri mümkündür, zararı yokdur, lâkin mersûm Mehmed Çavuş vaz‘-ı kadîmden ziyâde ihdâs eylediği saçağın ve mezbûrânın menzili içine nâzır olan penceresinin zarar ve havâlesi vardır deyu ittifâk ettiklerini mevlânâ-yı mezbûr mahallinde tahrîr ba‘dehû meclis-i şer‘de gelip inhâ ve takrîr etmeğin mâ-hüve’l-vâkı‘ bi’t-taleb ketb olundu. Hurrire fî-evâsıtı şehri Ramazâni’l-mübârek li-sene sitte ve selâsîn ve elf. Şühûdü’l-hâl: Es-Seyyid Haşim Çelebi b. es-Seyyid Mehmed, Avarlı Ahmed Efendi b. ( ) el-mütevellî, İbrahim b. Mustafa, Ali b. Abdullah, Abdi b. Abdullah, Ali Bey b. Hasan, Osman Beşe [b.] Sefer, Hasan Beşe [b.] Abdullah ve gayruhüm.