Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 546 Hüküm no: 487 Orijinal metin no: [159a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Ali’nin tasarrufundaki vakfa ait evin yanması üzerine enkazını satın alması ve arsayı kiralayarak üzerine yeniden ev yapmak istemesi Mahmiye-i Kostantıniyye’de vâki‘ Medîne-i Münevvere -sallallâhü te‘âlâ alâ-münevvirihâ- Evkāfı’na mütevellî olan fahrü’l-emâsil ve’l-akrân İsmail Çelebi b. Mehmed meclis-i şer‘-i hatîr-i lâzımü’t-tevkīrde işbu râfi‘ü’l-kitâb fahrü’l-a‘yân Ahmed Çelebi b. Ali muvâcehesinde ikrâr ve takrîr-i kelâm edip vakf-ı mezbûrdan olup mahmiye-i merkūmede Voynuk Şüca‘ mahallesinde bir tarafı Cevzi Ali Ağa mülkü ve bir tarafı İbrahim Çelebi ve iki tarafı tarîk-i hâs ile mahdûd olup büyût-ı müte‘addideyi müştemil olan vakıf menzilin icâre-i mu‘accele ve yevmî bir akçe icâre-i müeccele ile tasarrufu merkūm Çelebi yedinde iken hâlâ vâki‘ olan harkda menzil-i mezkûr bi’l-külliye muhterik olup cânib-i vakfda dahi ta‘mîrine müsâ‘ade olmamağla menzil-i mezkûrun üzerine varılıp nâib ve mi‘mâr keşf ve mesâha edip nıkzının kıymeti bin beş yüz akçeye ancak mütehammildir deyu ittifâk ettiklerinden sonra menzil-i mezkûrun nıkz-ı mersûmu vech-i muharrer üzere merkūm Ahmed Çelebi’ye meblağ-ı mezbûr bin beş yüz semen-i misli ile bey‘-i kat‘î ile bey‘ ve teslîm edip ol dahi nıkz-ı mersûmu vech-i meşrûh üzere iştirâ ve tesellüm eyledikde semen-i mezbûru tevliyyetim hasebiyle merkūm Ahmed Çelebi yedinden alıp kabz eylediğimden sonra menzil-i mezbûrun tûlen ve arzen bâ-hesâb-ı şatrancî yedi yüz iki zirâ‘ arsası beher sene üç yüz elli akçe mukāta‘a ile merkūm Ahmed Çelebi’ye îcâr eyledim, ol dahi arsa-i merkūmeyi vech-i mübeyyen üzere beher sene meblağ-ı mezbûr üç yüz elli akçe mukāta‘a ile kabûl eyledi, ba‘de’l-yevm arsa-i merkūme üzerinde merkūm Ahmed Çelebi kendi mâlıyla nefsi için mülkü olmak üzere müceddeden ebniye ihdâs eylesin dedikde mütevellî-i merkūmu ikrâr-ı meşrûhunda merkūm Ahmed Çelebi bi’l-müvâcehe tasdîk etmeğin mâ-hüve’l-vâkı‘ bi’t-taleb ketb olundu. Tahrîren fi’l-yevmi’t-tâsi‘ aşer mine’l-Muharremi’l-harâm li-sene semân ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Mefharü erbâbi’t-tahrîr ve’l-kalem Sıdkı Efendi b. Hasan, Umdetü’l-emâsil ve’l-a‘yân İsa Ağa b. ( ), Fahrü’l-cüyûş Hızır Çavuş b. Abdullah, Kaytan Bey b. Abdullah, Ali Bey b. Abdullah, el-Hâc Ali b. Ali, Hasan b. Hüseyin er-râcil, Mustafa b. Emrullah er-râcil, Ahmed Bey b. Ali el-cündî ve gayruhüm.