Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 547 Hüküm no: 488 Orijinal metin no: [159a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Bey b. Abdülmennan’ın tasarrufunda iken yanan Medine-i Münevvere Evkafı’na ait evin tamiri Mahmiye-i Kostantıniyye’de vâki‘ Medîne-i Münevvere -sallallâhü te‘âlâ alâ-münevvirihâ- Evkāfı’na mütevellî olan mefharü’l-emâsil ve’l-akrân İsmail Çelebi b. Mehmed meclis-i şer‘-i şerîf-i enverde takrîr-i kelâm edip vakf-ı mezbûrdan olup mahmiye-i mezbûrede Hoca Halil mahallesinde Hâssa Arabacılar kârhânesi kurbünde inde’l-cîrân ma‘lûmü’l-hudûd olup büyût-ı müte‘addideyi müştemil olan menzilin icâre-i mu‘accele ve müeccele ile tasarrufu işbu hâzır bi’l-meclis olan mefharü’l-a‘yân serrâcbaşı olan Hüseyin Bey b. Abdülmennan nâm kimesnenin taht-ı yedinde olup hâlen menzil-i mezkûr vâki‘ olan harkda bi’l-külliye muhterik olup menzil-i mezkûrun cânib-i vakfdan ta‘mîri lâzım gelmişdir, savb-ı şer‘-i şerîfden üzerine varılıp muhavvata-i dâhiliyyesinde müceddeden fevkānî iki bâb oda ve bir matbah ve dahlîz ve muhavvata-i hâriciyyesinde fevkānî bir bâb oda ve altında ahır binâsı ne mikdâr akçe ile ta‘mîr olunur, keşf ve tahmîn olunmak matlûbumdur dedikde kıbel-i şer‘den Mevlânâ Hasan Efendi b. Abdünnebî ve hâssa mi‘mârlardan Üstâd Ali Çelebi irsâl olunup zeyl-i sütûrda isimleri mastûr olan Müslimîn ile üzerine varılıp mu‘âyene ettiklerinde fi’l-hakīka bennâ zirâ‘ıyla tûlen otuz zirâ‘ ve arzen on yedi zirâ‘ bâ-hesâb-ı şatrancî beş yüz on zirâ‘ menzil-i mezkûrun arsası üzerinde muhavvata-i dâhiliyye ve hâriciyyesinde zikr olunan üç bâb fevkānî odalar ve matbah ve dahlîz ve ahırın müceddeden cüdrân-ı erba‘ası ve sukūf ve pencere ve cam ve kapı ve tavanının ahşâb ve elvâh ve ahcâr ve mesâmîr-i mütenevvi‘a ve neccâriye ve ırgadiye ve hammâliyesi seksen bin akçe ile ancak olur, ekal ile olmak mümkün değildir deyu ittifâk ettiklerinde vâki‘ hâli mevlânâ-yı mezbûr mahallinde tahrîr ba‘dehû meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Tahrîren fî-evâsıti’l-Muharremi’l-harâm li-sene semân ve selâsîn ve elf. Şühûdü’l-hâl: Ahmed Çelebi b. Ali el-hammâmî, Ömer Çelebi b. ( ) Şamî, Yusuf Ağa b. Abdullah el-müteferrika, Ali Bey b. Abdullah el-bostâniyü’s-sultânî ve gayruhüm.