Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 548 Hüküm no: 489 Orijinal metin no: [159b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı mütevellisi İsmail Çelebi’nin Sinan b. Abdullah ile eşi Amine bt. Hüsam tarafından vakfedilen evi teslim alması Mahmiye-i Kostantıniyye’de vâki‘ Medîne-i Münevvere -sallallâhü te‘âlâ alâ-münevvirihâ- Evkāfı’na mütevellî olan fahrü’l-emâsil ve’l-akrân İsmail Çelebi b. Mehmed meclis-i şer‘-i lâzımü’t-tevkīrde takrîr-i kelâm edip bundan akdem mahmiye-i mezbûrede Âbid Çelebi mahallesinde sâkin iken vefât eden merhûm Sinan Bey b. Abdullah ve zevcesi Âmine bt. Hüsam ber-vech-i iştirâk mutasarrıf olup iki tarafı Mustafa b. Mehmed el-imâm sâkin olduğu menzil ve bir tarafı Haydar b. Abdullah mülkü ve bir tarafı tarîk-i hâs ile mahdûd olup bir bâb tahtânî ve iki bâb fevkānî odayı ve bir hücre ve bir kîlârı ve kenîfi ve bi’r-i mâ’î ve muhavvata-i kebîreyi müştemil olan mülk menzillerini vakf edip süknâsını evvelâ nefislerine ba‘de vefâtihimâ Cancelîb bt. Abdullah nâm Hatuna ve ba‘de vefâtihâ utekālarına ba‘de’l-inkırâz Medîne-i Münevvere fukarâsına vakf ve şart ve ta‘yîn etmişler idi, el-hâletü hâzihî utekādan menzil-i mezbûra meşrûtiyet üzere mutasarrıfe olan Servinaz fevt olup utekā dahi münkarız olmağla menzil-i mezkûr Medîne-i Münevvere Vakfı’na âid olmuşdur, savb-ı şer‘den üzerine varılıp keşf ve mesâha ve mu‘âyene olunmak matlûbumdur dedikde kıbel-i şer‘den Mevlânâ Hasan Efendi b. Abdünnebî irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i sütûrda isimleri mastûr olan Müslimîn ile üzerine varılıp mu‘âyene ve mesâha ettiklerinde fi’l-hakīka bennâ zirâ‘ıyla tûlen yirmi altı zirâ‘ ve arzen on iki zirâ‘ bâ-hesâb-ı şatrancî üç yüz on iki zirâ‘ menzil-i mezkûrun arsası olduğunu ta‘yîn ve ittifâk ettiklerini mevlânâ-yı mezbûr mahallinde tahrîr ba‘dehû meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Hurrire fi’l-yevmi’s-sâbi‘ aşer mine’l-Muharremi’l-harâm li-sene semân ve selâsîn ve elf. Şühûdü’l-hâl: Ali Bey b. Mehmed el-cündî, Süleyman b. Mehmed el-cündî, Ahmed Bey b. Abdürrezzak el-bevvâbü’s-sultânî, İbrahim Bey b. Musa er-râcil, Muharrem b. Hızır et-tabbâh, Habib Efendi el-imâm, Osman Halîfe b. Abdülgaffar el-müezzin, Ali Bey b. Abdullah el-bevvâb ve gayruhüm mine’l-hâzırîn.