Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 104 Hüküm no: 25 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı İsa b. Abdülmümin’in, ölen Müşerrefe bt. Abdullah’ın terekesinden kendisine düşen yarım hissesini aldığı Dârü’l-hilâfeti’l-aliyye Kostantıniyye el-mahmiyye’de Müftü Ali Çelebi mahallesinde sâkine iken bundan akdem vefât eden Müşerrefe bt. Abdullah nâm hâtunun verâseti zevc-i metrûkü Osman Beşe b. Hacı Ali ile velâ-i itâka cihetinden Hacı İsa b. Abdülmümin’e münhasıra olduğu şer‘an zâhir ve müte‘ayyin oldukdan sonra mezbûr Hacı İsa tarafından husûs-ı âti’l-beyâna vekîl olduğu Fîruz Bey b. Abdullah ve Mehmed Çelebi b. Ahmed nâm kimesneler şehâdetleri ile şer‘an sâbit olan Yusuf Beşe b. Abdullah nâm kimesne meclis-i şer‘-i şerîfde müteveffât-ı mezbûrenin cümle terekesine vâzı‘ü’l-yed olan bâ‘isü’l-kitâb mezbûr Osman Beşe mahzarında bi’l-vekâle ikrâr ve takrîr-i kelâm edip müteveffât-ı mezbûrenin akār-ı menkūl cümle terekesinden müvekkilimin nısf hissesi mukābelesinde şerâitini hâvî bi tarîkü’t-tehârüci’ş-şer‘î mezbûr Osman Beşe ile yüz beş esedî guruşa sulh olup bedel-i sulh-i mezbûru mezbûr Osman Beşe kendi malından bana teslîm ben dahi ahz u kabz ettiğimden sonra tereke-i müteveffât-ı mezbûreye müte‘allika âmme-i de‘âvîmden mezbûr Osman Beşe’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Rebî‘ilâhir sene [10]77. Şuhûdü’l-hâl: Yahya Çelebi b. Mehmed Efendi, Mehmed Efendi b. İlyas, Mehmed Çelebi b. Ahmed, Yağcı Ali Çelebi, oturakçı Mehmed Çelebi, Murad Beşe b. Abdullah.