Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 548 Hüküm no: 490 Orijinal metin no: [159b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı mütevellisi İsmail Çelebi’nin Hüma Hatun bt. Hasan tarafından vakfedilen evi teslim alması Mahmiye-i Kostantıniyye’de vâki‘ Medîne-i Münevvere -sallallâhü te‘âlâ alâ-münevvirihâ- Evkāfı’na mütevellî olan mefharü’l-emâsil ve’l-akrân İsmail Çelebi b. Mehmed meclis-i şer‘-i hatîr-i lâzımü’t-tevkīrde takrîr-i kelâm edip mahmiye-i mezbûrede Öksüz mahallesinde sâkine iken bundan akdem müteveffât olan Hüma Hatun bt. Hasan hâl-i sıhhatinde mahalle-i mezbûrede bir tarafı Âişe Hatun mülkü ve bir tarafı Kamer Hatun mülkü ve bir tarafı Şah Sultân hucurâtı ve bir tarafı tarîk-i hâs ile mahdûd bir bâb fevkānî odayı ve sofayı müştemil olan mülk menzilini vakf edip süknâsını evvelâ nefsine ve ba‘de vefâtihâ utekāsından Peymane bt. Abdullah nâm Hatuna ve utekāsına ve evlâd-ı utekāsına ba‘de’l-inkırâz Medîne-i Münevvere fukarâsına şart ve ta‘yîn etmişdi, el-hâletü hâzihî menzil-i mezkûra ber-vech-i meşrûtiyet mutasarrıfe olan mezbûre Peymane fevt olup evlâd dahi münkarıza olmağla menzil-i mezbûr vakf-ı şerîfe âid olmuşdur, savb-ı şer‘den üzerine varılıp keşf ve mesâha ve mu‘âyene olunmak matlûbumdur dedikde kıbel-i şer‘den Mevlânâ Hasan Efendi b. Abdünnebî irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i sütûrda isimleri mastûr olan Müslimîn ile üzerine varıp mu‘âyene ve mesâha ettiklerinde fi’l-hakīka bennâ zirâ‘ıyla tûlen on dört zirâ‘ ve arzen altı buçuk zirâ‘ bâ-hesâb-ı şatrancî doksan bir zirâ‘ menzil-i mezkûrun arsası olduğunu ta‘yîn ve ittifâk ettiklerini, vâki‘ hâli mevlânâ-yı mezbûr mahallinde tahrîr ba‘dehû meclis-i şer‘de gelip inhâ ve takrîr etmeğin mâ-hüve’l-vâkı‘ bi’t-taleb ketb olundu. Hurrire fi’l-yevmi’s-sâbi‘ aşer mine’l-Muharremi’l-harâm li-sene semân ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Ali Bey b. Abdullah, Mustafa Çelebi b. ( ) el-kâtib, Ali Çelebi b. Hızır, İsmail Bey b. ( ) el-câbî ve gayruhüm.