Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 549 Hüküm no: 491 Orijinal metin no: [159b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Bali’nin vakfedip azatlılarından Zamane bt. Abdülvehhab’ın tasarrufundayken yanan evinin keşfi İşbu râfi‘ü’l-kitâb Zamane bt. Abdülvehhab meclis-i şer‘de takrîr-i kelâm edip bundan akdem vefât eden mevlâm Mehmed Çelebi b. Bâli mahmiye-i İstanbul’da Elvanzâde mahallesinde vâki‘ bir tarafı Dîdebân Mustafa mülkü ve bir cânibi Serrâc İshak Vakfı ve iki cânibi Ahmed Paşa ve Ramazan ve Ya‘kub Paşa Vakıfları ve tarîk-i âm ile mahdûd olup büyût-ı müte‘addideyi müştemil olan mülk menzilini vakf edip süknâsını evvelâ nefsine ba‘de vefâtihî utekāsına ba‘de’l-inkırâz Medîne-i Münevvere fukarâsına şart edip hâlâ meşrûtiyet üzere menzil-i mezkûreye mutasarrıfe iken vâki‘ olan ihrâkda menzil-i mezkûr bi’l-külliye muhterik olup ta‘mîrine kudretim olmamağın menzil-i mezkûrun nısf arsası üzerinde işbu hâzır bi’l-meclis olan zevcim İlyas b. Salih nâm kimesne icâre-i mu‘accelesine mahsûb olmak üzere ma‘rifet-i mütevellî ile müceddeden binâ ihdâs etmeğe izin vermişidim, el-hâletü hâzihî savb-ı şer‘den üzerine varılıp arsa-i mezbûrenin nısfı keşf ve ta‘yîn ve mezbûr İlyas’a vech-i muharrer üzere binâya izin verilmek matlûbumdur dedikde kıbel-i şer‘den Mevlânâ Hasan Efendi b. Abdünnebî irsâl olunup mu‘âyene ettiklerinde fi’l-hakīka menzil-i mezbûrun bennâ zirâ‘ıyla tûlen otuz üç ve arzen yedi buçuk zirâ‘ bâ-hesâb-ı şatrancî iki yüz elli bir zirâ‘ arsası olduğunu mesâha ve ta‘yîn edip nısfı yüz yirmi beş buçuk zirâ‘ eder deyu ittifâk ettiklerini mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mezbûr İlyas’a dahi zevcesi merkūme Zamane ile vech-i muharrer üzere binâya izin verilip mâ-hüve’l-vâkı‘ bi’t-taleb ketb olundu. Hurrire fî-evâhiri Zilhicceti’ş-şerîfe li-sene seb‘a ve selâsîn ve elf. Şühûdü’l-hâl: El-Hâc Sefer Bey b. Mehmed Ser-kazganiyân, Derviş Ahmed b. Hüseyin, Hüseyin Bey b. Abdullah el-cündî, Ali Bey b. Abdullah el-bevvâb, Musa b. Ali, el-Hâc Rıdvan b. Abdullah, el-Hâc Ali b. İslam ve gayruhüm.