Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 550 Hüküm no: 492 Orijinal metin no: [159b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Vakfı’na ait Saraylı Hatun’un oturduğu vakıf eve komşusu Ayşe Hatun tarafından yapılan müdahalenin önlenmesi Mahmiye-i Kostantıniyye’de Medîne-i Münevvere -sallallâhü te‘âlâ alâ-münevvirihâ- Vakfı’na mütevellî olan fahrü’l-emâsil ve’l-akrân İsmail Çelebi b. Mehmed meclis-i şer‘-i şerîf-i enverde takrîr-i kelâm edip vakf-ı mezbûrdan olup mahmiye-i merkūmede Hazret-i Şeyh Ebî Vefa Câmi‘-i şerîfi mahallesinde vâki‘ bir tarafı Sitti Hatun Vakfı ve bir cânibi Malkoç Ağa mülkü ve bir cânibi yine vakf-ı mezbûrdan Âişe Hatun icâresinde olan menzil ve bir cânibi tarîk-i âm ile mahdûd olan menzile icâre-i mu‘accele ve müeccele ile Saraylı nâm Hatun mutasarrıfe iken mezbûre Saraylı Hatun’un tasarrufunda olan menzil-i mezkûrun mersûme Âişe Hatun tarafından taş duvarına ve kenîfi yerine mezbûre Âişe Hatun müdâhale eder, savb-ı şer‘den üzerine varılıp keşf olunmak matlûbumdur dedikde kıbel-i şer‘den Mevlânâ Hasan Efendi ve hâssa mi‘mârlardan Üstâd Ali Çelebi b. Halil irsâl olunup zeyl-i sütûrda isimleri mastûr olan Müslimîn ile üzerine varılıp mu‘âyene ettiklerinde fi’l-hakīka mârru’z-zikr taş duvara muttasıl olan altı parmak arzı olan taş duvardan mâverâsı ve kenîfi mehâzîsinde olan taş duvarın başından tahta havlu ile kenîf mezbûre Saraylı Hatun icâresinde olan vakıf menzilindir deyu mu‘âyene ve müşâhede ettiklerini mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ gıbbe’t-taleb ketb olundu. Hurrire fî-evâsıtı’l-Muharremi’l-harâm li-sene semân ve selâsîn ve elf. Şühûdü’l-hâl: El-Hâc Ahmed Çelebi b. Abdi, Ömer Çelebi b. Ali, Mehmed Çelebi b. Ali, Yusuf Ağa b. ( ) el-müteferrika, Ali Bey b. Abdullah el-bevvâb ve gayruhüm.