Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 550 Hüküm no: 493 Orijinal metin no: [160a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı’na ait harap evin enkazının Saray-ı Atik teberdaranı kethüdası Ahmed Ağa’ya satılması ve arsasının kiraya verilmesi Dârü’s-saltanati’s-seniyye Kostantıniyyetü’l-mahmiye’de Medîne-i Münevvere -sallallâhü te‘âlâ alâ-münevvirihâ- Evkāfı’na mütevellî olan fahrü’l-emâsil ve’l-akrân İsmail Çelebi b. Mehmed meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-erkânda mahmiye-i mezbûrede Sarây-ı Atîk-i Sultânî teberdârânı kethüdâsı olan sâhibü hâze’l-kitâb kıdvetü’l-emâcid ve’l-ekârim umdetü’l-efâhim ve’l-e‘âzim zü’l-kadri’r-refî‘ ve’l-câhi’l-menî‘ el-mahfûfu bi-sunûfi avâtıfi’l-meliki’l-a‘lâ Ahmed Ağa b. ( ) muvâcehesinde ikrâr u i‘tirâf edip bundan akdem vefât eden merhûm Mustafa Efendi hâl-i hayâtında mahmiye-i mezbûrede Üskûbî mahallesinde iki tarafı mahalle-i merkūme mescidi vakfı ve bir tarafı yine Haremeyn-i Şerîfeyn Vakfı ve bir tarafı Kasım Paşa mülkü ve tarîk-i hâs ile mahdûd büyût-ı müte‘addideyi ve üç su kuyusunu müştemil olan mülk menzilini vakf ve habs edip süknâsını evvelâ nefsine ba‘dehû evlâdına ba‘de’l-inkırâz Medîne-i Münevvere fukarâsına vakf ve şart edip hâlen evlâddan menzil-i mezkûra mutasarrıf olan Ahmed Çelebi fevt olup evlâd münkarız olmağla menzil-i mezkûr vakfa âid olmuşdu, el-hâletü hâzihî menzil-i mezbûr mürûr-ı eyyâm ile harâb olup kābil-i intifâ‘ olmayıp ta‘mîrine cânib-i vakfda dahi müsâ‘ade olmamağla menzil-i mezbûrun nıkzı Sûk-ı Sultânî’de tâlibine arz olunup ragabât-ı nâs inkıtâ‘ından sonra müşârun-ileyh Ahmed Ağa üzerinde yetmiş bin akçede karâr edip ziyâde ile tâlib-i âhar bulunmamağın nıkz-ı mezkûru müşârun-ileyh Ahmed Ağa’ya meblağ-ı mezbûr yetmiş bin nakd-i râyic fi’l-vakt akçeye vakfa enfa‘ olmağla ber-mûceb-i izn-i şer‘-i kavîm bey‘-i kat‘î ile bey‘ ve teslîm edip ol dahi vech-i mübeyyen üzere iştirâ ve tesellüm eyledikde semen-i mezbûru müşârun-ileyh Ahmed Ağa yedinden tamâmen alıp kabz eylediğimden sonra menzil-i mezbûrun tûlen ve arzen bâ-hesâb-ı şatrancî otuz bin dokuz yüz elli zirâ‘ arsasını beher sene yedi yüz yirmi akçe mukāta‘a ile müşârun-ileyh Ahmed Ağa’ya îcâr eyledim, ba‘de’l-yevm müşârun-ileyh Ahmed Ağa arsa-i mezkûre üzerinde kendi mâlıyla mülkü olmak üzere müceddeden binâ ihdâs eylesin dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu. Hurrire fi’l-yevmi’s-sânî min-Ramazâni’l-mübârek li-sene seb‘a ve selâsîn ve elf. Şühûdü’l-hâl: Mefharü’l-emâsil ve’l-akrân Mehmed Ağa b. ( ) Kethüdâ-yı âğa-yı sarây-ı mezbûr, Zübdetü’l-eşbâh Ahmed Halîfe b. Abdülmennan, Abdurrahman Bey b. Abdullah el-bevvâbü’s-sultânî, Süleyman Bey b. Mustafa el-bevvâbü’s-sultânî, Hasan Bey b. Abdullah el-bevvâbü’s-sultânî, Yusuf Bey b. Abdullah el-bevvâbü’s-sultânî, Mehmed Bey b. ( ) el-bevvâb, Muharrirü’l-hurûf Hasan Efendi ve gayruhüm.