Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 551 Hüküm no: 494 Orijinal metin no: [160a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazenin bt. Abdullah’ın oturduğu vakıf evin yanması üzerine evin yeniden kocası Hasan b. Abdullah tarafından yapılması Mahmiye-i İstanbul’da Şemseddin mahallesinde sâkine Nazenin bt. Abdullah nâm hatun meclis-i şer‘de zevci Hasan b. Abdullah nâm kimesne mahzarında ikrâr u i‘tirâf edip bundan akdem müteveffât olan seyyidem Pervinaz bt. Abdullah nâm hatun mahalle-i mezbûrede vâki‘ etrâf-ı erba‘ası Emrullah Efendi ve Şah Mehmed Efendi el-imâm ve Muslihiddin Subaşı mülkleri ve tarîk-i âm ile mahdûd olan mülk menzilini hâl-i sıhhatinde vakf edip süknâsını evvelâ nefsine ba‘de vefâtihâ bana ve benim vefâtımdan sonra Medîne-i Münevvere fukarâsına şart ve ta‘yîn etmişidi, el-hâletü hâzihî menzil-i mezkûr bi’l-külliye muhterik olup ta‘mîrine kudretim olmamağla menzil-i mezkûrun cânib-i şer‘den Nâib Ömer Efendi ve hâssa mi‘mârlardan Ali Çelebi cemâ‘at-i müslimîn ile üzerine varıp mesâha ettiklerinde tûlen yirmi iki zirâ‘ ve arzen yirmi buçuk zirâ‘ bâ-hesâb-ı şatrancî dört yüz elli bir zirâ‘ arsasından nısf-ı şâyi‘inin hakk-ı tasarrufunu vakf-ı mezbûr mütevellîsi ma‘rifetiyle mezbûr Hasan’a tefvîz edip ol dahi vech-i muharrer üzere tefevvüz ve kabûl eyledi, ba‘de’l-yevm arsa-i mezkûre üzerine merkūm Hasan icâre-i mu‘accelesine mahsûb olmak üzere kendi mâlıyla müceddeden binâ ihdâsına izin verildi dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu, cerâ zâlik ve, Hurrire fî-evâili’l-Muharremi’l-harâm li-sene semân ve selâsîn ve elf. Şühûdü’l-hâl: Mehmed b. Şa‘ban el-imâm, el-Hâc İbrahim b. Nasuh el-müezzin, Mehmed b. Sefer, Ca‘fer b. Mehmed, Mustafa Bey b. ( ) el-bevvâb, Hasan Beşe b. ( ) Korucu ve gayruhüm.