Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 552 Hüküm no: 495 Orijinal metin no: [160a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hayreddin’in vakfettiği evde oturan Fatma Hatun’un evin yanması üzerine yeniden yapmaya kocası Halil Beşe b. Yusuf ve Beşir Bey b. Abdullah’a izin vermesi Mahmiye-i İstanbul’da Kiçi Hatun mahallesi sâkinlerinden Beşir Bey b. Abdullah nâm bevvâb-ı sultânî meclis-i şer‘-i şerîf-i lâzımü’t-teşrîfde takrîr-i kelâm edip mahalle-i mezbûrede sâkine iken vefât eden merhûme Âişe Hatun bt. Hayreddin mahalle-i mezbûrede vâki‘ bir tarafı İmâm Mehmed Efendi Vakfı ve bir tarafı Safiye Hatun bt. Abdullah mülkü ve bir tarafı Abdülcelil Bey b. Mustafa mülkü ve bir tarafı tarîk-i âm ile mahdûd olup iki beyt-i süflî ve iki sofa ve muhavvatayı müştemil menzilini hâl-i sıhhatinde vakf ve habs edip süknâsını evvelâ kendi nefsine ba‘dehâ sadr[î] oğlu Veli Çavuş’a ve ba‘de vefâtihî mezbûr Veli Çavuş’un evlâdına ba‘de’l-inkırâz Medîne-i Münevvere fukarâsına şart ve ta‘yîn etmekle menzil-i mezbûrun tasarrufu mersûm Veli Çavuş’un sulbiye kebîre kızları Fâtıma Hatun ve Âişe Hatun’a münhasıra olmağın anlar dahi ba‘de’t-taksîm menzil-i mezbûrdan herbiri bir beyt-i süflî ve bir sofa ve bir kenîf ve muhavvatayı mutasarrıfe iken mezbûre Fâtıma Hatun’un tasarrufunda olan menzil bi’l-külliye muhterik olup kendi mâlıyla cümlesini müceddeden binâya kudreti olmamağın menzil-i mezbûrun müceddeden binâsına ancak mezbûre Fâtıma Hatun ancak on beş bin akçe ve mezbûrenin izniyle icâre-i mu‘accelesine mahsûb olmak üzere zevci Halil Beşe b. Yusuf dahi on beş bin akçe harc u sarf edip mâ‘adâsını icâre-i mu‘acceleye mahsûb olmak üzere kendi mâlıyla tekmîle bana izin vermeğin ben dahi Medîne-i Münevvere -salavâtullâhi te‘âlâ alâ-münevvirihâ- Evkāfı’na mütevellî olan fahrü’l-akrân İsmail Çelebi b. Mehmed nâm bevvâb-ı sultânî ma‘rifeti ve izn-i şer‘le icâre-i mu‘acceleme mahsûb olmak üzere menzil-i mezbûrun binâsını tekmîl etmişimdir, kıbel-i şer‘-i şerîfden üzerine varılıp harc u sarf olunan meblağın mertebe-i tahammülü tahmîn-i sahîh ile tahmîn ve takvîm olunması matlûbumdur dedikde savb-ı şer‘i- mergūbdan Mevlânâ Ali Efendi b. Mustafa irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i sütûrda isimleri mastûr olup ebniye ve sukūfa vukūfu olan bî-garaz Müslimîn ile üzerine varıp bennâ zirâ‘ıyla tûlen otuz zirâ‘ ve arzen yirmi zirâ‘ hesâb-ı şatrancî üzere altı yüz zirâ‘ arsa üzerine müceddeden mebnî iki tahtânî ve iki fevkānî oda ve bir kenîf ve kameriye ve selâmlığı ta‘bîr olunur bir fevkānî odayı mu‘âyene ve mesâha eylediklerinde hesâb-ı mezbûr üzere iki bin iki yüz elli zirâ‘ taş duvarın nıkzından mâ‘adâ hâtıl ve taş ve mismâr ve ırgadiye ve neccâriyesine her zirâ‘ı yirmişer akçeden kırk beş bin akçe ve bi-hesâb-ı mezbûr üç yüz on üç zirâ‘ odalar ve kameriye ve kenîf ve kîlâr döşemesinin mertek ve elvâh ve tuğla ve mesâmîr-i mütenevvi‘a ve üstâdiyye ve ırgadiyesine her zirâ‘ı ellişer akçeden on beş bin altı yüz elli akçe ve bi-hesâb-ı mezbûr iki yüz zirâ‘ tavanın teneke ve mismâr ve bennâ? ve üstâdiyye ve ırgadiye ve boyasına her zirâ‘ı kırkar akçeden sekiz bin akçe ve bi-hesâb-ı mezbûr üç yüz zirâ‘ dolma duvarın [160b] direk ve tuğla ve sıva ve mismâr ve üstâdiyye ve ırgadiyesine her zirâ‘ı otuzar akçeden dokuz bin akçe ve hesâb-ı mezbûr üzere üç yüz zirâ‘ sakfın elvâh ve mertek ve mismâr ve padavra ve kiremid ve üstâdiyye ve ırgadiyesine her zirâ‘ı altmışar akçeden on sekiz bin akçe ki cem‘an doksan beş bin altı yüz elli akçeye mütehammildir, noksân ile mümkün değildir deyu ittifâklarını mezbûre Fâtıma Hatun vech-i mübeyyen üzere binâya mezbûrân Beşir Bey ve Halil Beşe’ye izin verdiğine ikrârını mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ gıbbe’t-taleb ketb u sebt olundu. Tahrîren fî-evâsıtı Muharremi’l-harâm li-sene semân ve selâsîn ve elf. Şühûdü’l-hâl: Fahrü’l-emâcid ve’l-ekârim Kasım Ağa b. Abdüddâim, İbrahim Subaşı b. Abdülmennan, Feridun Bey b. Abdullah el-bevvâbü’s-sultânî, el-Hâc Hüseyin Halîfe el-imâm, Hüseyin b. İsmail el-müezzin, el-Hâc Muharrem el-kayyim, Abdülhalim b. Hamza, Mehmed Ağa b. Mehmed el-müteferrika ve gayruhüm mine’l-hâzırîn.