Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 553 Hüküm no: 496 Orijinal metin no: [160b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Mehmed b. el-Hac Hamza’nın Haremeyn Vakfı’na ait evi kiralaması Mahmiye-i İstanbul hısnı ebvâbından Kumkapı kurbünde Bâli Paşa mahalle[si] sâkinlerinden bâ‘isü hâze’l-kitâb el-Hâc Mehmed b. el-Hâc Hamza meclis-i şer‘de takrîr-i kelâm edip Haremeyn-i Şerîfeyn Evkāfı’ndan olup bir tarafı serrâc Receb Bey mülkü ve bir tarafı Hoca Nasuh Vakfı ve bir tarafı tarîk-i hâs ve bir tarafı tarîk-i âm ile mahdûd tûlen otuz altı zirâ‘ ve arzen yirmi altı zirâ‘ bi-hesâb-ı şatrancî bennâ zirâ‘ıyla dokuz yüz otuz altı zirâ‘ arsa üzerine mebnî muhavvata-i dâhiliyyesi üç bâb fevkānî oda ve bir tahtânî odayı ve muhavvata-i hâriciyyesi iki fevkānî oda ve kenîf ve bir dükkânı müştemil menzili mutasarrıfe olan Emine Hatun fevt olup menzil-i mezbûr cânib-i vakfa âid olmağın Sûk-ı Sultânî’de müzâyede olunup ragabât-ı nâs inkıtâ‘ından sonra yevmî iki akçe ücret-i müeccele ile râyic fi’l-vakt otuz bin akçe icâre-i mu‘acccelede benim üzerimde karâr edip ziyâde ile tâlib-i âhar bulunmamağın vakf-ı mezbûra mütevellî olan İsmail Çelebi b. Mehmed menzil-i mezbûru yevmî iki akçe ücret-i müeccele ile meblağ-ı merkūm otuz bin akçe icâre-i mu‘accele ile bana îcâr edip ben dahi vech-i muharrer üzere istîcâr ve kabûl eylediğimden sonra menzil-i mezbûrun tasarrufu ve lâzım gelen müceddeden binâ ve meremmete harc u sarf ettiğim meblağ ba‘de’t-tahmîn icâre-i mu‘acceleye mahsûb olması için izin ve yedime tezkire vermişdir, nazar olunup mûcebince kıbel-i şer‘den dahi hüccet-i şer‘iyye taleb ederin deyu mütevellî-i mezbûrun hatt u hatemini müştemil ve târîh-i kitâb Saferü’l-hayrı evâhiriyle müverrah tezkire ibrâz eyledikde ba‘de’n-nazar ve’l-kırâe mazmûnu takrîrine muvâfık olmağın mûcebince kıbel-i şer‘den dahi bu hurûf li-ecli’t-temessük yedine def‘ olundu. Tahrîren fî-evâsıtı şehri Rebî‘i’l-evvel li-sene semân ve selâsîn ve elf. Şühûdü’l-hâl: Ali Bey b. Abdullah el-bevvâb, Abdullah Efendi el-müsta‘id, Ramazan Efendi el-müsta‘id, Ali Çelebi el-mi‘mâr, İbrahim Beşe b. Abdullah, Hasan b. Veli, Ahmed b. Abdullah, Hasan b. Abdullah.