Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 554 Hüküm no: 497 Orijinal metin no: [160b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı’na ait evde oturan Ahmed Çelebi b. Ali’ye yanan evini yeniden yapmaya izin verilmesi Mahmiye-i İstanbul’da vâki‘ Medîne-i Münevvere -sallallâhü te‘âlâ alâ-münevvirihâ- Evkāfı’na mütevellî olan fahrü’l-akrân İsmail Çelebi b. Mehmed meclis-i şer‘de işbu râfi‘ü’l-kitâb fahrü’l-a‘yân Ahmed Çelebi b. Ali muvâcehesinde ikrâr u i‘tirâf edip vakf-ı mezbûrdan olup mahmiye-i merkūmede Voynuk Şücâ‘ mahallesinde bir tarafı Kuzu Ali Ağa mülkü ve bir tarafı İbrahim Çelebi b. ( ) mülkü ve iki tarafı tarîk-i hâs ile mahdûd olup büyût-ı müte‘addideyi müştemil olan vakf menzil-i mezkûr bi’l-külliye muhterik olup cânib-i vakfda dahi ta‘mîrine müsâ‘ade olmamağla menzil-i mezkûrun üzerine varılıp nâib ve mi‘mâr keşf ve mesâha ettiklerinde tûlen ve arzen bâ-hesâb-ı şatrancî yedi yüz iki zirâ‘ arsasını beher sene üç yüz akçe mukāta‘a ile merkūm Ahmed Çelebi’ye îcâr edip ol dahi vech-i muharrer üzere istîcâr ve kabûl eyledi, ba‘de’l-yevm arsa-i merkūme üzerinde merkūm Ahmed Çelebi kendi mâlıyla nefsi için mülkü olmak üzere müceddeden ebniye ihdâsına izin verdim dedikde gıbbe’t-tasdîk bi’t-taleb ketb olundu. Tahrîren fi’l-yevmi’t-tâsi‘ aşer mine’l-Muharremi’l-harâm sene semân ve selâsîn ve elf. Şühûdü’l-hâl: Sıdkı Efendi b. Hasan, İsa Ağa b. Hasan b. Hüseyin, Hızır Çavuş b. Abdullah, Kaytas Bey b. Abdulalh, Mustafa b. Emrullah, Ali Bey b. Abdullah, Ahmed Bey b. Ali er-râcil, el-Hâc Ali b. Ali.