Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 555 Hüküm no: 498 Orijinal metin no: [161a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı’na ait evde oturan Ahmed Çelebi b. Ali’ye yanan evini yeniden yapmaya izin verilmesi Mahmiye-i İstanbul’da Voynuk Şücâ‘ mahallesinde sâkin fahrü’l-akrân Ahmed Çelebi b. Ali meclis-i şer‘de takrîr-i kelâm edip Medîne-i Münevvere Vakfı’ndan olup mahalle-i mezbûrede vâki‘ bir tarafı Kuzu Ali Ağa mülkü ve bir tarafı İbrahim Çelebi mülkü ve iki tarafı tarîk-i âm ile mahdûd büyût-ı müte‘addideyi müştemil olan vakıf menzile icâre-i mu‘accele ve yevmi bir akçe icâre-i müeccele ile ben mutasarrıf iken hâlen vâki‘ olan harkda menzil-i mezkûr bi’l-külliye muhterik olup ta‘mîrine vakıfda müsâ‘ade olmamağla müceddeden ihdâs eylediğim binâ mülküm olmak üzere vakf-ı mezbûr mütevellîsi olan fahrü’l-akrân İsmail Çelebi b. Mehmed vech-i muharrer üzere binâya izin vermişdi, el-hâletü hâzihî savb-ı şer‘den üzerine varılıp menzil-i mezkûrun nıkzı ne mikdâr akçeye mütehammildir, takvîm-i sahîh ile takvîm ve tahmîn olunmak matlûbumdur dedikde kıbel-i şer‘den Mevlânâ Hasan Efendi b. Abdünnebî irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i sütûrda isimleri mastûr olan Müslimîn ile üzerine varıp mütevellî-i mûmâ-ileyh İsmail Çelebi muvâcehesinde mu‘âyene ettiklerinde fi’l-hakīka menzil-i mezkûrun tûlen ve arzen bi-hesâb-ı şatrancî yedi yüz iki zirâ‘ arsası olup ve menzil-i mezkûrun nıkzı dahi bin beş yüz akçeye mütehammildir, ziyâdeye tahammülü yokdur deyu ta‘yîn ve tahmîn ve ittifâk eylediklerinde vâki‘ hâli mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr, merkūm Ahmed Çelebi’ye ihdâs eylediği binâsı mülkü olmak üzere binâya izin verilip mâ-hüve’l-vâkı‘ gıbbe’t-taleb ketb olundu. Tahrîren fi’l-yevmi’l-hâmis aşer mine’l-Muharremi’l-harâm li-sene semân ve selâsîn ve elf. Şühûdü’l-hâl: Sıdkı Efendi b. Hasan, İsa Ağa b. ( ), Hızır Çavuş b. Abdullah, Kaytas Bey b. Abdullah, Ali Bey b. Abdullah el-bevvâb, el-Hâc Ali b. Ali, Hasan b. Hüseyin er-râcil, Mustafa Beşe b. Emrullah er-râcil, Ahmed Bey b. Ali el-cündî.