Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 556 Hüküm no: 499 Orijinal metin no: [161a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Servazad Hatun’un Haremeyn Vakfı’na bağışladığı bekar odalarının tamir ettirilmesi Mahmiye-i İstanbul’da merhûm ve mağfûrün-lehâ Servazad Hatun’un Haremeyn-i Şerîfeyn’e vakf ve ta‘yîn eylediği evkāfa bi’l-fi‘il mütevellî olan fahrü’l-akrân İbrahim Çelebi b. Mustafa nâm bevvâb-ı sultânî meclis-i şer‘-i şerîfde takrîr-i kelâm edip evkāf-ı mezbûreden olup mahmiye-i mezbûrede Kādıasker Hamâmı kurbünde vâki‘ lede’l-ahâlî ma‘lûmü’l-hudûd mücerred odalarının taş duvarı ve sakfı meremmete muhtâc olmuşdur, kıbel-i şer‘den üzerine varılıp keşf ve tahrîr ve mâl-ı vakf-ı mezbûr ile meremmete izin verilmesi matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Hasan Çelebi b. Hüseyin ve zeyl-i kitâbda isimleri mastûr olan bî-garaz Müslimîn ile üzerine varıp mu‘âyene ve mesâha eylediklerinde bennâ zirâ‘ıyla tûlen yirmi yedi zirâ‘ ve kadden dört zirâ‘ bi-hesâb-ı şatrancî yüz sekiz zirâ‘ taş duvar ve sâbıku’z-zikr odaların sakfı meremmete muhtâc olduğunu mi‘mâr-ı mezbûr ve sâir ehl-i vukūf bi’l-ittifâk haber verdiklerinden mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr ettikden sonra evkāf-ı mezbûre mâlıyla sâbıku’z-zikr duvar ve sakfı meremmete izin birle mâ-hüve’l-vâkı‘ gıbbe’t-taleb ketb olundu. Tahrîren fî-evâsıtı şehri Rebî‘i’l-âhir min-şühûr sene semân ve selâsîn ve elf. Şühûdü’l-hâl: Ali Bey b. Abdullah el-bevvâb, Yusuf Bey b. Abdullah, Timur Bey b. İshak, İbrahim Beşe b. Abdullah ve gayruhüm.