Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 556 Hüküm no: 500 Orijinal metin no: [161b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hızır Paşa tarafından vakfedilip Medine-i Münevvere Vakfı’na intikal eden evi Sağ Ulufeciler Ağası Kemankeş Ali Ağa b. İlyas’ın kiralaması Atebe-i Aliyye-i Sultâniye’de hâlâ sağ ulûfeciler ağası olan iftihârü’l-emâcid ve’l-ekârim kıdvetü’l-emâsil ve’l-e‘âzim Kemankeş Ali Ağa b. İlyas hazretleri taraf-ı karînü’ş-şereflerinden husûs-ı âti’l-beyâna vekîl olup vekâleti nehc-i şer‘î üzere sâbite olan mefharü’l-emâsil ve’l-eşbâh Yusuf Ağa b. Abdullah nâm zevvâk-ı sultânî mahfil-i şer‘-i şerîf-i şâmihü’l-erkân ve meclis-i dîn-i münîf-i râsihü’l-bünyânda takrîr-i kelâm edip bundan akdem vefât eden merhûm mağfûr ed-dâric ilâ-medârici rabbihi’l-gafûr Hızır Paşa hazretleri hâl-i hayâtında Dârü’l-hilâfeti’l-aliyye Kostantıniyyetü’l-mahmiye’de Kadırga Limanı kurbünde Bostancıbaşı mahallesi demekle ma‘rûf olan mahallede vâki‘ bir tarafı merhûm-ı müşârun-ileyhin zevcesine şart eylediği menzil ve bir tarafı İsmail Ağa mülkü ve bir tarafı Mustafa Bey nâm bevvâb-ı sultânî sâkin olduğu vakıf menzil ve bir tarafı bazen tarîk-i hâs ve bazen tarîk-i âm ile mahdûd olup bennâ zirâ‘ıyla tûlen yüz dört zirâ‘ ve arzen yetmiş zirâ‘ ve bâ-hesâb-ı şatrancî yedi bin iki yüz seksen zirâ‘ üzerine mebnî fevkānî bir dîvânhâne ve bir kâşîli kebîr oda ve bir sofayı ve yanında iki bâb küçük odayı ve mârru’l-beyân dîvânhânenin nerdübânı kurbünde matbah ve fevkānî ve tahtânî altı bâb odayı ve altındna bir ahırı ve bir kîlârı ve önünde çatma odayı ve içkapı kurbünde fevkānî ve tahtânî üç bâb odayı ve çeşmeyi ve kenâyif-i adîdeyi müştemil mülk menzilini vakf ve habs edip süknâsını evvelâ nesf-i nefîsine ba‘dehû Mehmed Bey nâm kebîr oğluna ba‘dehû evlâdına ve evlâd-ı evlâdına ba‘de’l-inkırâz -ne‘ûzü billâhi min-kahri’l-feyyâz- Medîne-i Münevvere -ve alâ-münevvirihâ salavâtu mükerrere- fukarâsına vakf ve şart edip hâlâ menzil-i mezbûra mutasarrıf olan mûmâ-ileyh Mehmed Bey fevt olup evlâdı kalmamağla menzil-i mezkûr Haremeyn-i Şerîfeyn Evkāf-ı şerîfine âid ve râci‘ olmağın mütevellîsi olan zahrü’l-emâsil ve’l-ahrân İsmail Çelebi b. Mehmed menzil-i mezbûru Sûk-ı Sultânî’de tâlibine arz edip ragabât-ı nâs inkıtâ‘ından sonra iki yüz otuz bin akçe icâre-i mu‘accele ve yevmî sekizer akçe ücret-i müeccele ile hâmilü hâze’l-kitâb müşârun-ileyh Ali Ağa üzerinde karâr edip ziyâde ile tâlib-i âhar bulunmamağın mütevellî-i mûmâ-ileyh menzil-i mezkûru müşârun-ileyh Ali Ağa’ya meblağ-ı merkūm iki yüz otuz bin [akçe] icâre-i mersûme ve yevmî sekiz akçe müeccele ile îcâr edip anlar dahi istîcâr ve kabûl eylediklerinden sonra mütevellî-i merkūm meblağ-ı mezbûr iki yüz otuz bin akçe icâre-i mu‘acceleyi vakf-ı mezbûr için müvekkil-i müşârun-ileyh Ali Ağa yedinden tamâmen ahz u kabz eyledikde menzil-i mezkûrun ekser mevâzi‘i harâb olup meremmete muhtâc olmağın icâre-i mu‘accelesine mahsûb olmak üzere mûmâ-ileyh Ali Ağa kendi mâlından meremmet edip mukābelede icâre-i müeccele olan yevmî sekiz akçenin iki akçesini tenzîl olunup ve nefs-i nefîseleri için ebniye-i cedîde ihdâs edip ba‘de’t-tahmîn ve’t-takvîm icâre-i mu‘accelesine mahsûb olup ba‘de’l-yevm yevmü’l-kıst hesâbı üzere beher şehr lâzım olan yüz seksen akçesin cânib-i evkāf-ı şerîfe-i mezbûreye edâ ve teslîm edip keyfe [mâ]-yeşâ mutasarrıf olmak üzere mütevellî-i mezbûr müvekkil-i müşârun-ileyhe izin birle târîh-i kitâb senesi Cemâziyelâhire’si gurresi ile müverrah ve hatem ve imzâsını müştemil müvekkil-i müşârun-ileyh yedine temessük vermişdi, el-hâletü hâzihî temessük-i mezbûra nazar olunup mûcebince li-ecli’l-istihkâm cânib-i şer‘-i kavîmden hüccet-i şer‘iyye verilmesi matlûbumdur dedikde vekîl-i mersûm yedinde olan mütevellî temessüğüne nazar olundukda mazmûnu min-külli’l-vücûh vekîl-i merkūmun takrîr-i meşrûhuna mutâbık olmağın hâzihi’l-hurûf li-ecli’t-temessük ketb ve yed-i tâlibe def‘ olundu. Tahrîren fî-evâhiri Cemâziyelâhire li-sene semân ve selâsîn ve elf. Şühûdü’l-hâl: ( )