Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 557 Hüküm no: 501 Orijinal metin no: [161b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Paşa tarafından vakfedilip Haremeyn Vakfı’na intikal eden evi Sağ Ulufeciler Ağası Ali Ağa b. İlyas’ın kiralaması Haremeyn-i Şerîfeyn Evkāfı’na bi’l-fi‘il mütevellî olan fahrü’l-emâsil İsmail Çelebi b. Mehmed meclis-i şer‘-i şerîf-i şâmihü’l-erkân ve mahfil-i dîn-i münîf-i râsihü’l-bünyânda Atebe-i Aliyye’de hâlâ sağ ulûfeciler ağası olan hâmilü hâze’l-kitâb iftihârü’l-emâcid ve’l-ekârim zeynü’l-emâsil ve’l-e‘âzim Ali Ağa b. İlyas mahzarında ikrâr-ı tâm ve takrîr-i kelâm edip bundan akdem fevt olan merhûm Ca‘fer Paşa hâl-i hayâtında iken mahmiye-i İstanbul Kadırga Limanı kurbünde Bostancıbaşı mahallesinde vâki‘ bir tarafı merhûm-ı mûmâ-ileyhin zevcesine şart eylediği menzil ve bir tarafı İsmail Ağa mülkü ve bir tarafı Mustafa Bey nâm bevvâb-ı sultânî sâkin olduğu vakıf menzil ve bir tarafı bazen tarîk-i hâs ve bazen tarîk-i âm ile mahdûd bennâ zirâ‘ı ile tûlen yüz dört ve arzen yetmiş bi-hesâb-ı şatrancî yedi bin iki yüz seksen zirâ‘ arsa üzerine mebnî fevkānî bir dîvânhâne ve bir kâşîli kebîr oda ve altında bir bâb ahır ve bir kîlâr ve önünde bir çatma oda ve içkapı kurbünde fevkānî ve tahtânî üç bâb oda ve bir çeşmeyi ve kenâyif-i müte‘addideyi müştemil olan mülk menzilini vakf ve habs edip süknâsını evvelâ kendi nefsine ba‘dehû sulbî kebîr oğlu Mehmed Bey’e ba‘dehû evlâdına ve evlâd-ı evlâdına ba‘de’l-inkırâz Medîne-i Münevvere fukarâsına şart ve ta‘yîn edip hâlâ menzil-i mezbûra mutasarrıf olan mûmâ-ileyh Mehmed Bey fevt olup evlâdı kalmamağla menzil-i mezbûr evkāf-ı merkūmeye âid ve râci‘ olmağla tevliyet-i mahkiyem hasebiyle menzil-i mezkûru Sûk-ı Sultânî’de tâlibine arz edip ba‘de’l-müzâyede ve gıbbe inkıtâ‘i’r-rağbe iki kere yüz bin ve otuz bin akçe icâre-i mu‘accele ve yevmî altı akçe ücret-i müeccele ile mûmâ-ileyh Ali Ağa üzerinde karâr edip ziyâde ile tâlib-i âhar bulunmamağın menzil-i mezbûru mûmâ-ileyh Ali Ağa’ya meblağ-ı merkūm iki kerre yüz bin ve otuz bin akçe icâre-i mu‘accele ve yevmî altı akçe ücret-i müeccele ile îcâr edip anlar dahi vech-i muharrer üzere istîcâr ve kabûl eylediklerinden sonra icâre-i mu‘accele olan meblağ-ı mezbûru evkāf-ı merkūm için müşârun-ileyh Ali Ağa yedinden bi’t-tamâm ahz u kabz eyledim dedikde mütevellî-i mûmâ-ileyh İsmail Çelebi’yi vech-i muharrer üzere sâdır olan ikrârın el-mukırru lehü’l-müşârü ileyh Ali Ağa vicâhen tasdîk ve şifâhen tahkīk edicek, mâ-hüve’l-vâkı‘ gıbbe’t-taleb ketb ve yed-i tâlibe def‘ olundu. Tahrîren fî-evâhiri Cemâziyelâhire li-sene semân ve selâsîn ve elf. Şühûdü’l-hâl: Kıdvetü kuzâti’l-islâm es-Seyyid Hasan Efendi b. Mehmed el-kādî, fahrü’l-eimme Abbas Efendi el-imâm, Ya‘kub Efendi b. el-Hâc Halil, zahrü’l-emâsil ve’l-emâcid İsmail Ağa Kethüdâ-yı Hazret-i Halil Paşa, Kasım Çavuş b. ( ) Dergâh-ı âlî, Siyavuş Bey b. Abdullah el-cündî, Mehmed Bey b. ( ) el-cündî, zahrü ashâbi’t-takrîr Abdurrahman Efendi, fahrü’l-emâsil Ahmed Ağa Kethüdâ-yı Teberdârân-ı Sarây-ı Atîk, Mefharü’l-emâsil Süleyman Ağa Kethüdâ-yı Ağa-yı Dârüssaâde, Osman Bey b. ( ) el-cündî, fahrü’l-akrân Mehmed Subaşı, Hüseyin Bey b. Abdullah el-cündî, Mehmed Beşe b. Sefer el-cündî, Rıdvan Halîfe Ulûfeciyân, Mustafa Efendi el-kâtib, Abdullah b. Ahmed, Ali Bey b. Abdullah el-bevvâbü’s-sultânî ve gayruhüm.