Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 559 Hüküm no: 502 Orijinal metin no: [162a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haleb’li Ahmed Çelebi b. Hüseyin’in vakfiyesi Elhamdülillâhi rabbi’l-âlemîn ve’s-salâtü ve’s-selâmü alâ-hâtemi’l-enbiyâi ve’l-mürselîn seyyidünâ Muhammed el-meb‘ûsü bi’l-âyâti’l-kātı‘a ammâ ba‘d. İşbu mazmûnunda vakıf ikrârından bahseden sahîh ve şer‘î bir hüccettir. Aslen Haleb’li olub Dârü’s-saltanati’s-seniyye mahmiye-i Kostantıniyye’de Mahmud Paşa Hanı’nda sâkin fahrü’l-emsâl Ahmed Çelebi b. Hüseyin meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda hâzır olup âti’z-zikr vakfa tescîl maksadıyla mütevellî nasbettiği fahrü’l-müderrisîn Abdulbâki Efendi b. Ahmed mahzarında şöyle ikrâr ve i‘tirâf eyledi ki, işbu vakıf ikrârının kendisinden sudûruna kadar mâliki olduğu ve taht-ı tasarrufunda bulundurduğu, mahrûse-i Haleb mahallâtından Süveykiyye Ali mahallesinde vâki‘, altında kiler bulunan fevkānî bir hâneyi, murabba‘ ta‘bîr edilen hâneyi, tahtânî bir bâb hâneyi, mutfağı, mutfağın içinden geçen mâ-i cârîyi, havuzlu bahçeyi, eşcâr-ı müsmire ve gayri müsmireli diğer bir bahçeyi hâvî, hudûdu şarken ve şimâlen tarîk-ı hâs ile, kıbleten ba‘zan Kutmanî mülkü ba‘zan Attâr el-Hâc Mehmed mülkü ile mahdûd bulunan cemî‘ menzilini cümle tevâbi‘i ve levâhıkı ve muzâfâtı ve kâffe-i menâfi‘i ve merâfıkı ve mensûbâtı ile niyet-i sâfiye ve taviyyet-i vâfiye üzere habs ve vakfetti. Menzil-i mezbûrda süknâyı mâdâm ki hayâtda ola evvelâ nefs-i nefîsesine, sonra evlâdına, evlâd-ı evlâdına batnen ba‘de batnin ve karnen isre karnin şart etti. Ba‘de’l-inkırâz, menzil-i mezkûrun Haremeyn-i şerîfeyn evkāfı mütevellîsi yediyle ecr-i misille icâreye verilip hâsıl olan ücret-i kirânın Haremeyn-i şerîfeyn evkāfı mahsûlüne ilhâkını ve Haremeyn-i şerîfeyn fukarâsına irsâlini şart etti. Menzil-i mezbûru tescîl maksadıyla mütevellî nasbettiği mezbûr Abdulbâki Efendi’ye teslîm etti. O dahi tesellüm edip sâir mütevellîler evkāfda nasıl tasarruf ettiler ise öyle tasarruf eyledi. Mütevellî-i mezbûr vâki‘ ikrârı vicâhen ve şifâhen tasdîk etti. Emr-i vakf-ı mezbûr vech-i mastûr üzere tamâm olduğunda vâkıf-ı mezkûr İmâm-ı a‘zam Ebû Hanîfe katında vakfın adem-i lüzûmuna mütemessiken vakfiyyetten rücû‘ edip menzilin mülk-i sahîhine ilhâkını talep ve istirdâd eyledi. Mütevellî, imâmeyn-i hümâmeynin re’ylerine tevfîkan redden imtinâ‘ edince hâkim-i muvakki‘ü’l-kitâb huzûrunda murâfa‘a edip tarafeynden hüküm taleb ettiklerinde hâkim-i mûmâ-ileyh, cânib-i vakfı ihtiyâr edip menzil-i merkūmun vakfiyetinin lüzûmuna -âlimen bi’l-hilâf beyne’l-eimmeti’l-eşrâf- hükmetmekle vakf-ı mezbûr müseccel, müebbed bir vakıf olarak bi’l-ittifâk evkāf-ı lâzimeden oldu. Fe-men beddelehû ba‘de mâ-semi‘ahû fe-innemâ ismühû ale’llezîne yübeddilûnehû inna’llâhe semî‘un alîm. Ve ecrü’l-vâkıf ale’l-hayyi’l-cevâdi’l-kerîm. Cerâ zâlike ve hurrire fi’l-yevmi’s-sâbi‘ ve’l-ışrîn min-Cemâziyelâhire li-sene semân ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Fahrü’l-cüyûş Bekir Çavuş b. Şehâbeddin?, fahrü’l-cüyûş Bekir Çavuş, fahrü’l-akrân Hasan Bey b. Ömer el-cündî, el-Hâc Bahâüddin el-kādî, el-Hâc Atâullah b. el-Hâc Mehmed el-yesârî, el-Hâc Mehmed b. râcil, Şeyh Hasan Efendi el-imâm, Mustafa Efendi b. Mirza el-müderris, Ahmed Efendi b. Mustafa, Hasan Bey b. Abdülmennan nâtur (gözcü), Mehmed Çelebi b. merhûm Ömer Efendi el-yesârî, Hasan Bey b. Abdullah el-bevvâbü sultânî, Mehmed Beşe b. Durak er-râcil ve gayrühüm mine’l-hâzırîn