Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 560 Hüküm no: 503 Orijinal metin no: [162b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Abdullah’ın Haremeyn Vakfı’na ait oturduğu evin yanması üzerine kendi parasıyla yeniden yaptırması Mahmiye-i İstanbul’da Hoca Teberrük mahallesinde sâkine Meryem bt. Abdullah nâm hatun meclis-i şer‘de takrîr-i kelâm edip Haremeyn-i Şerîfeyn Vakfı’ndan olup icâre-i mu‘accele ve yevmî iki buçuk akçe ücret-i müeccele ile mutasarrıfe olduğum mahalle-i mezbûrede vâki‘ lede’l-ahâlî ma‘lûmü’l-hudûd menzil bi’l-külliye muhterik olup cânib-i vakfdan müceddeden binâya müsâ‘ade olmayıp icâre-i mu‘acceleme mahsûb olmak üzere kendi mâlım ile müceddeden binâ etmişimdir, cânib-i şer‘den üzerine varılıp harc u sarf ettiğim meblağın mertebe-i tahammülü tahmîn ve takvîm olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i sütûrda isimleri mastûr olan Müslimîn ile üzerine varılıp mu‘âyene ve vakf-ı mezbûra mütevellî olan İsmail Çelebi b. Mehmed mahzarında mesâha eylediklerinde bennâ zirâ‘ıyla tûlen on altı ve arzen on iki bi-hesâb-ı şatrancî yüz doksan sekiz zirâ‘ arsa üzerine mebnî iki fevkānî ve üç tahtânî odaların bi-hesâb-ı mezbûr yüz doksan üç zirâ‘ döşemesinin her zirâ‘ı ellişer akçeden dokuz bin altı yüz elli akçe ve bi-hesâb-ı mezbûr yüz otuz dokuz zirâ‘ dolma duvarın her zirâ‘ı otuzar akçeden dört bin yüz yetmiş akçe ve bi-hesâb-ı mezbûr yüz kırk sekiz zirâ‘ sakfın her zirâ‘ı ellişer akçeden dokuz bin dört yüz akçe ve bi-hesâb-ı mezbûr yüz yirmi sekiz zirâ‘ tavanın her zirâ‘ı kırk akçeden beş bin yüz yirmi akçe ve bi-hesâb-ı mezbûr iki yüz elli altı zirâ‘ mahlût taş duvarın her zirâ‘ı yirmi beşer akçeden altı bin dört yüz akçe ve dört masandra dört bin sekiz yüz akçe ve sekiz demirli pencere üç bin iki yüz akçe ve altı dolap bin sekiz yüz akçe ve sekiz cam sekiz yüz akçe ve beş ocak iki bin beş yüz akçe ve beş oda kapısı bin akçe ve iki sokak kapısı bin akçe cem‘an kırk dokuz bin sekiz yüz kırk akçeye tahammülü olduğunu ve menzil-i mezbûrun icâre-i müeccelesinin ecr-i misli yevmî bir buçuk akçe olduğunu mi‘mâr-ı mezbûr ve sâir ehl-i vukūf haber verdiklerini mevlânâ-yı mezbûr mahallinde tahrîr ba‘dehû gelip meclis-i şer‘de inhâ ettikden sonra yevmî iki buçuk akçenin bir akçesi tenzîl olunup mâ-hüve’l-vâkı‘ bi’t-taleb ketb olundu. Tahrîren fî-evâsıtı Rebî‘i’l-evvel li-sene seb‘a ve selâsîn ve elf. Şühûdü’l-hâl: Mehmed Ağa Ser-arabacıyân-ı Hâssa, Dilaver Bey b. Abdullah el-bevvâb, Ali Bey b. Abdullah el-bevvâb.