Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 563 Hüküm no: 505 Orijinal metin no: [163b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi İsmail Çelebi’nin Mehmed Ağa tarafından vakfedilen evi teslim alması Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed meclis-i şer‘-i şerîf-i enverde takrîr-i kelâm edip mahmiye-i İstanbul’da İshak Paşa mahallesinde sâkin Mehmed Ağa hâl-i hayâtında mahalle-i mezbûrede vâki‘ bir tarafdan Mustafa Kethüdâ veresesi mülkleri ve bir tarafdan Osman Ağa mülkü ve iki tarafdan tarîk-i âm ve hâs ile mahdûd olup dâhiliyyesinde iki beyt-i ulvî ve iki beyt-i suflî ve bir sofa-i ulviye ve bir sofa-i süfliye ve kameriye ve matbah ve kenîf ve bi’r-i mâ’î ve muhavvatayı ve muhavvata-i hâriciyyesi tahtânî ve fevkānî beş bâb oda ve ahırı ve kenîfi müştemil menzilini vakf ve habs edip süknâsını evvelâ nefsine ba‘dehû ( ) nâm Hatuna ba‘dehâ evlâdına ba‘de’l-inkırâz Medîne-i Münevvere fukarâsına şart edip meşrûtün-lehüm bi’l-külliye münkarız olmağla menzil-i mezbûr evkāf-ı mezbûreye âid olmuşdur, cânib-i şer‘den üzerine varılıp mu‘âyene ve mesâha olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i kitâbda isimleri mastûr olan Müslimîn ile üzerine varıp mu‘âyene ve mesâha eylediklerinde bennâ zirâ‘ıyla tûlen otuz iki ve arzen yirmi dört bi-hesâb-ı şatrancî yedi yüz altmış iki zirâ‘ arsa üzerine mebnî menzil-i mezbûru mu‘âyene ve müşâhede eylediklerini mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ gıbbe’t-taleb ketb olundu. Tahrîren fî-gurreti şehri Rebî‘i’l-âhir li-sene tis‘a ve selâsîn ve elf. Şühûdü’l-hâl: Dilaver Bey b. Abdullah el-bevvâb, Ali b. Yahya, İsmail Çelebi b. Mahmud, İbrahim Çelebi b. Mustafa, Ali Çelebi b. Receb.