Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 563 Hüküm no: 506 Orijinal metin no: [163b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi İsmail Çelebi’nin Emine bt. Abdullah tarafından vakfedilen evi teslim alması Haremeyn-i Şerîfeyn Evkāfı’na bi’l-fi‘il mütevellî olan İsmail Çelebi b. Mehmed meclis-i şer‘-i şerîf-i enverde takrîr-i kelâm edip mahmiye-i İstanbul’da Kızılminare mahallesinde sâkine Emine bt. Abdullah nâm hatun mahalle-i mezbûrede vâki‘ bir tarafdan Hasan Çavuş mülkü ve bir tarafdan Malkoç Ağa mülkü ve bir tarafdan Mustafa Subaşı mülkü ve bir tarafdan müezzine meşrût vakıf menzilini hâl-i hayâtında vakf ve habs edip süknâsını evvelâ nefsine ba‘dehâ utekāsına ba‘de’l-inkırâz Medîne-i Münevvere fukarâsına şart etmekle ber-vech-i meşrûtiyet menzil-i mezbûru utekāsından Cemile bt. Abdullah fevt olmağla menzil-i mezbûr evkāf-ı mezbûreye âid olmuşdur, cânib-i şer‘den üzerine varılıp mu‘âyene ve mesâha olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i kitâbda isimleri mastûr olan Müslimîn ile üzerine varıp mu‘âyene ve mesâha eylediklerinde bennâ zirâ‘ıyla tûlen yirmi sekiz arzen on altı bi-hesâb-ı şatrancî dört yüz kırk sekiz zirâ‘ ve tûlen yirmi üç ve arzen iki bi-hesâb-ı mezbûr kırk altı zirâ‘ ki cem‘an dört yüz doksan dört zirâ‘ arsa üzerine mebnî üç beyt-i süflî ve bir sofa ve kenîf ve bi’r-i mâ’î ve muhavvatayı müştemil menzili müşâhede eylediklerini mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Tahrîren fî-evâhiri şehri Rebî‘i’l-evvel min-şühûri sene tis‘a ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Hasan Çavuş-ı Dergâh-ı Âlî, İbrahim Çavuş-ı Dergâh-ı Âlî, Mustafa Çelebi b. Abdullah el-kâtib, Diğer Mustafa Çelebi b. ( ) el-kâtib, Hasan Çelebi b. Hüseyin.