Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 564 Hüküm no: 507 Orijinal metin no: [163b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi İsmail Çelebi’nin Kerime bt. Abdullah tarafından vakfedilen evi teslim alması Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed meclis-i şer‘-i şerîf-i enverde takrîr-i kelâm edip mahmiye-i Galata muzâfâtından Kal‘a-i Boğazkesen dâhilinde Köse kulesi kurbünde sâkine Kerime bt. Abdullah nâm hatun bir tarafdan el-Hâc Mehmed Bey el-Cündî mülkü ve bir tarafdan Ahmed Çelebi mülkü ve iki tarafdan tarîk-i âm ve hâs ile mahdûd olup iki beyt-i süflî ve bir anbâr ve bir dahlîz ve bir abdesthâne ve bir kenîfi müştemil menzilini hâl-i hayâtında vakf ve habs edip süknâsını evvelâ nefsine ba‘dehâ menzil-i mezbûrun nısfı zevci Ahmed’e ve nısf-ı âharını atîkası ( ) bt. Abdullah’a ba‘dehâ Medîne-i Münevvere fukarâsına şart edip mezbûr Ahmed fevt olmağla menzil-i mezbûrun nısfı cânib-i vakf-ı mezbûra âid olmuşdur, cânib-i şer‘den üzerine varılıp müşâhede olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i kitâbda isimleri mastûr olan Müslimîn ile üzerine varıp mu‘âyene ve mesâha eylediklerinde bennâ zirâ‘ıyla tûlen on sekiz ve arzen on beş bi-hesâb-ı şatrancî iki yüz yetmiş zirâ‘ arsa üzerine mebnî menzil-i mezbûru müşâhede eylediklerinde vâki‘ hâli mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Tahrîren fî-evâhiri şehri Rebî‘i’l-evvel li-sene tis‘a ve selâsîn ve elf. Şühûdü’l-hâl: Ali Ağa Dizdâr-ı kal‘a-i mezbûr, Mehmed Efendi b. Ali el-hatîb, Mustafa Çavuş b. Sinan, Muharrem b. Halil ve gayruhüm.