Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 565 Hüküm no: 508 Orijinal metin no: [164a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na intikal eden evin Mahmud Dede b. Abdülmennan ile hanımı Zeyneb bt. Abdülmennan’a kiraya verilmesi Dârü’s-saltanati’s-seniyye Kostantıniyyetü’l-mahmiye’de vâki‘ Haremeyn-i Şerîfeyn Evkāfı’na mütevellî olan fahrü’l-emâsil ve’l-ekârim İsmail Çelebi b. Mehmed meclis-i şer‘-i şerîf-i lâzımü’t-tevkīrde hâfızâ hâze’l-kitâb Mahmud Dede b. Abdülmennan ve zevcesi Zeyneb bt. Abdülmennan nâm hatun muvâcehelerinde ikrâr-ı tâm ve takrîr-i kelâm edip mahmiye-i mezbûre mahallâtından Ayasofya-i Kebîr kurbünde Mahalle-i Cedîd sâkinelerinden olup bundan akdem vefât eden sâhibetü’l-hayrâtdan Emine bt. Abdullah nâm hatun mahalle-i mezbûrede vâki‘ bir tarafı Mustafa Bey b. Abdi mülkü ile ve bir tarafı Sarây-ı Cedîd duvarı ile ve bir tarafı Veli Bey b. Abdülmennan mülkü ile ve taraf-ı âharı tarîk-i âm ile mahdûd olup tûlen on bir zirâ‘ ve arzen dokuz zirâ‘ bi-hesâb-ı şatrancî yüz dokuz zirâ‘ arsa üzerinde mebnî bir bâb beyt-i ulvî ve bir bâb beyt-i suflî ve bir dahlîz ve kenîfi müştemil olan menzilini vakf edip süknâsını evvelâ kendüye ba‘dehâ vâlidesi Kamer Hâ[tû]n’a şart edip ânın vefâtından sonra Haremeyn-i Şerîfeyn fukarâsına ta‘yîn ettiği vakfiyesinde mastûr ve mukayyed olmağın hâlâ meşrûtün-aleyhâ olandan kimesne kalmayıp menzil-i merkūmun tasarrufu cânib-i vakf-ı şerîfe âid olmağın müzâyede olunup rağbet-i nâs inkıtâ‘ından sonra mezbûrân Mahmud Dede ve zevcesi Zeyneb Hatun üzerlerinde on dokuz bin akçe icâre-i mu‘accele ve beher şehr yirmi akçe ücret-i müeccele ile karâr edip ziyâde ile tâlib-i âhar zuhûr etmemeğin ben dahi menzil-i merkūmu vech-i mersûm üzere on dokuz bin akçe icâre-i mu‘accele ve beher şehr yirmi akçe ücret-i müeccele ile mezbûrâna ber-vech-i iştirâk ale’s-seviyye îcâr edip anlar dahi istîcâr ve kabûl ettiklerinden sonra icâre-i mu‘accelesi olan on dokuz bin akçeyi mezbûrân yedlerinden bi’t-tamâm ahz u kabz ettim dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu. Fi’l-yevmi’t-tâsi‘ min-âhiri’r-rebî‘ayn li-sene tis‘a ve selâsîn ve elf. Şühûdü’l-hâl: Fahrü’l-müderrisîn Halim Çelebi, Zahrü’l-mülâzimîn Abdullah Çelebi, Ali Çelebi b. Halil el-mi‘mâr, Hasan Çelebi b. Hüseyin el-mi‘mâr ve gayruhüm.