Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 565 Hüküm no: 509 Orijinal metin no: [164a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Teberdar Rıdvan Halîfe’nin tasarrufundaki vakıf evi Hatice bt. Abdülmennan’a devretmesi Mahrûsa-i Kostantıniyye’de vâki‘ Sarây-ı Cedîd-i Sultânî teberdârlarından zahrü’l-emâsil ve’l-ekârim Rıdvan Halîfe b. Abdülmennan meclis-i şer‘-i şerîf-i lâzımü’t-tevkīrde hâfızü hâze’l-kitâb Hadice bt. Abdülmennan nâm hatun muvâcehesinde ikrâr-ı tâm ve takrîr-i kelâm edip Haremeyn-i Şerîfeyn Evkāfı’ndan mahallât-ı mahmiye-i mezbûreden Muhtesib Karagöz mahallesinde vâki‘ bir tarafı medrese duvarı ile ve bir tarafı Mustafa Çelebi hatunu mutasarrıfe olduğu menzil ile ve tarafeyn-i âhareyni tarîk-i âm ile mahdûd olup bennâ zirâ‘ı ile tûlen yirmi dört buçuk zirâ‘ ve arzen yirmi dört [zirâ‘] bi-hesâb-ı şatrancî beş yüz seksen sekiz zirâ‘ arsa üzerinde mebnî muhavvata-i dâhiliyyesi üç bâb beyt-i ulvî ve bir sofa ve bir dahlîz ve bir tahtânî oda ve sofa ve bi’r-i mâ ve muhavvata ve kenîfi müştemil olup ve hâriciyyesi bir bâb beyt-i ulvî ve tahtında ahırı müştemil icâre-i mu‘accele ve yevmî bir akçe icâre-i müeccele ile tasarrufumda olan menzilin hakk-ı karâr ve tasarrufunu mütevellî-i evkāf-ı mezbûre ma‘rifeti ile mersûme Hadice Hatun’a tefvîz edip ol dahi tefevvüz ve kabûl ettikden sonra mukābele-i tefvîz yedinden otuz bin nakd-i râyic fi’l-vakt fıddî akçeyi ahz u kabz edip menzil-i mezbûru teslîm ettim, ba‘de’l-yevm icâre-i müeccelesi olan yevmî bir akçeyi cânib-i vakf-ı merkūma edâ edip keyfemâ teşâ ve tahtâr mutasarrıfe olsun dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu. Tahrîren fi’l-yevmi’t-tâsi‘ min-âhiri’r-rebî‘ayn li-sene tis‘a ve selâsîn ve elf. Şühûdü’l-hâl: Mustafa Çelebi b. Abdülmennan Kâtib-i vakıf, Mustafa Çelebi b. Mehmed Kâtib-i evkāf-ı mezbûre, Ali Çelebi b. Mehmed Câbî-i evkāf, Dilaver Bey b. Abdülmennan, Ali Bey b. Abdülmennan.