Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 566 Hüküm no: 510 Orijinal metin no: [164a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait olup Nazenin bt. Abdullah’ın tasarrufunda iken yanan evi kocası Hasan Beşe b. Abdullah’ın yeniden yaptırması Dârü’s-saltanati’s-seniyye Kostantıniyyetü’l-mahrûsa mahallâtından Şemseddin mahallesi sâkinlerinden hâfızü hâze’l-kitâb Hasan Beşe b. Abdullah meclis-i şer‘-i şerîf-i lâzımü’t-tevkīre gelip takrîr-i kelâm edip mahalle-i mezbûrede vâki‘ bir tarafı Emrullah Efendi mülkü ile ve bir tarafı İmâm Şah Mehmed Efendi mülkü ile ve bir tarafı Muslihiddin Subaşı mülkü ile ve taraf-ı âharı tarîk-i âm ile mahdûd ulvî ve suflî büyût-ı müte‘addideyi müştemil olup süknâsını zevcem Nazenin bt. Abdullah nâm Hatuna ba‘dehâ Haremeyn-i Şerîfeyn fukarâsına meşrût olan menzil bundan akdem bi’l-külliye muhterik oldukda zevcem mezbûrenin binâya kudreti olma[ma]ğın ba‘de’l-mesâha arsasının nısfını mütevellî-i vakf ma‘rifeti ile tefvîz ve ben dahi tefevvüz ve kabûl ve mâlım ile müceddeden binâya bundan akdem me’zûn olduğum ecilden hâlâ binâ etmişimdir, savb-ı şer‘den üzerine varılıp arsası mesâha ve sarf u harc ettiğim meblağın mertebe-i tahammülü görülüp tahmîn-i sahîh ile tahmîn olunmak matlûbumdur dedikde savb-ı şer‘-i şerîfden Mevlânâ Mustafa Efendi irsâl olunup ol dahi mi‘mârân-ı hâssadan Hasan Çelebi b. Hüseyin ve ebniye ve sukūfa vukūfu [164b] olup zeyl-i kitâbda mastûrü’l-esâmî olan bî-garaz Müslimîn ile menzil-i mezbûrun üzerine varıp müşâhede ettiklerinde tûlen on sekiz ve arzen dört zirâ‘ bi-hesâb-ı şatrancî bennâ zirâ‘ı ile iki yüz elli iki zirâ‘ arsa üzerinde mebnî üç bâb fevkānî odaların sakfının hesâb-ı mezbûr üzere her zirâ‘ı elli beşer akçeden on üç bin sekiz yüz atmış akçe ve iki yüz elli iki zirâ‘ döşemenin her zirâ‘ı kırkar akçeden hesâbı üzere on bin seksen akçe ve tûlen ve arzen doksan iki zirâ‘ dolma duvarın sıvası ile her zirâ‘ı yetmişer akçeden altı bin üç yüz kırk akçe ve yedi pencere bin beş yüz akçe ve yedi camına altı yüz otuz akçe ve üç masandrasına bin beş yüz akçe ve üç oda kapısına beş yüz kırk akçe ve sekiz pâyeli üç nerdübânın herbiri ikişer yüz ellişer akçeden yedi yüz elli akçe ve iki sokak kapısına sekiz yüz akçe ve elli zirâ‘ duvar badanasına iki yüz elli akçe ve nerdübân muhâzisinde on beş zirâ‘ mıhlama parmağına doksan akçe ve on dört zirâ‘ tahta perdesine iki yüz yirmi akçe ve ve on bir sütûnuna herbiri yüz yirmişer akçe hesâb üzere bin iki yüz yirmi akçe ve iki odasının tavanına bin iki yüz akçe ve kereste-i kenîf ve sâir harcına beş yüz yirmi akçe cem‘an otuz dokuz bin beş yüz kırk akçeye tahammülü olup noksân ile mümkün olmadığı mi‘mâr-ı mezbûr tahmîn-i sahîh ile tahmîn edip haber verdiğini mevlânâ-yı mezbûr mahallinde tahrîr edip ba‘dehû meclis-i şer‘de inhâ ve takrîr ettikden sonra mâ-hüve’l-vâkı‘ gıbbe’t-taleb ketb u terkīm olundu. Fi’l-yevmi’s-sânî min-âhiri’r-rebî‘ayn li-sene tis‘a ve selâsîn ve elf. Şühûdü’l-hâl: Fahrü’l-eimme Mehmed Efendi b. Şa‘ban el-imâm, el-Hâc İbrahim b. Nasuh el-müezzin, Mehmed b. Sefer, Ca‘fer b. Mehmed, Ali Bey b. Abdülmennan el-bevvâb.