Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 567 Hüküm no: 511 Orijinal metin no: [164b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait dükkanların arsasına komşu dükkanın sahibi Seyyid Hasan Çelebi’nin tecavüz etmesi Haremeyn-i Şerîfeyn Vakfı’na bi’l-fi‘il mütevellî olan İsmail Çelebi b. Mehmed meclis-i şer‘-i şerîf-i enverde takrîr-i kelâm edip vakf-ı mezbûrdan olup mahmiye-i İstanbul’da Sağrıcılar Mescidi mahallesinde vâki‘ lede’l-cîrân ma‘lûmü’l-hudûd üç bâb kuyumcu dükkânlarının arsasından bir mikdâr arsasına câr-ı mülâsıkı olan dükkânın sâhibi es-Seyyid Hasan Çelebi nâm kimesne tecâvüz edip taş duvar binâ eylemişdir, cânib-i şer‘den üzerine varılıp müşâhede ve mesâha olunması matlûbumdur, savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i kitâbda isimleri mastûr olan Müslimîn ile üzerine varıp mu‘âyene ve mesâha eylediklerinde mezbûr es-Seyyid Hasan Çelebi sâbıku’z-zikr dekâkînin tarîk-i âm tarafından nısf zirâ‘ arsasına tecâvüz ve üzerine taş duvar binâ eylediğini mi‘mâr-ı mezbûr ve sâir ehl-i vukūf haber verdiklerini mevlânâ-yı mezbûr mahallinde tahrîr ba‘dehû meclis-i şer‘de inhâ ve takrîr etmeğin mâ-hüve’l-vâkı‘ gıbbe’t-taleb ketb olundu. Tahrîren fî-evâsıtı Muharremi’l-harâm li-sene tis‘a ve selâsîn ba‘de elf min-hicreti men lehü’l-izzü ve’ş-şeref. Şühûdü’l-hâl: Mustafa Efendi b. Abdülgani el-imâm, Mehmed Çavuş b. Server Çavuş, Mehmed b. Osman, Mustafa Çelebi el-kâtib, Ali Çelebi b. ( ) el-câbî.