Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 568 Hüküm no: 512 Orijinal metin no: [164b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sitti Hatun bt. Mustafa’nın, kocası Mehmed b. Mahmud’un süknasını şart ederek vakfettiği evde oturduğu Dergâh-ı Âlî kapıcılarından olup bi’l-fi‘il Haremeyn-i Şerîfeyn Evkāfı’na mütevellî olan Mustafa Bey b. Mehmed meclis-i şer‘de mahmiye-i İstanbul’da Sekbanbaşı mahallesi sâkinelerinden Sitti Hatun bt. Mustafa mahzarında takrîr-i da‘vâ edip mezbûre Sitti Hatun’un zevci bundan akdem fevt olan merhûm Mehmed b. Mahmud nâm kimesne mahalle-i mezbûrede vâki‘ hudûdunun bir tarafı Süleyman b. Abdullah mülküne ve bir tarafı tarîk-i âmma ve bir tarafı Kara Hızır mülküne ve bir tarafı tarîk-i hâssa müntehî olup iki beyt-i süflî ve bir beyt-i ulvî ve selâmlığı ve altında bir dükkânı müştemil mülk menzilini hâl-i hayâtında Medîne-i Münevvere’ye vakf ve tescîl ve teslîm-i mütevellî eylemişdir, hâlâ menzil-i mesfûre Sitti Hatun’un tasarrufundadır, tevliyyetim hasebiyle vakf için zabt olunmasını taleb ederim dedikde gıbbe’s-suâl mezbûre Sitti Hatun cevâb verip fi’l-vâki‘ zevcim müteveffâ-yı mezbûr Mehmed Bey zikr olunan mülk menzili Medîne-i Münevvere’ye vakf eylemişdir, lâkin ibtidâ süknâsını bana şart edip ben vefât ettikden sonra sulbiye kızı Belkıs’a ba‘dehâ Medîne-i Münevvere fukarâsına vakf ve şart eylemişdir dedikde gıbbe’l-inkâr mezbûre Sitti’den kelâmına mutâbık beyyine taleb olundukda mahalle-i mezbûreden el-Hâc Nasuh b. Halil ve Mehmed b. Pîrî Halîfe ve el-Hâc Nasuh el-müezzin ve İsmail b. Ali [165a] el-imâm ve Mahmud Çelebi ve Ferruh b. Abdullah ve Derviş Efendi el-Kādî ve Musa b. Ali meclis-i şer‘a hâzırûn olup fi’l-vâki‘ mezbûr Mehmed Bey zikr olunan menzili hâl-i hayâtında vakf edip süknâsını ibtidâ zevcesi mezbûreye şart edip ba‘dehâ kızı mezbûre Belkıs’a ba‘dehâ Medîne-i Münevvere fukarâsına şart eylemişdir, biz bu husûsa şâhidleriz, şehâdet dahi ederiz deyu edâ-i şehâdet-i şer‘iyye eylediklerinde şehâdetleri hayyiz-i kabûlde vâkı‘a olup mâ-cerâ bi’t-taleb ketb olundu. Tahrîren fî-evâhiri Muharremi’l-harâm li-sene hamse ve elf. Şühûdü’l-hâl: Mehmed b. Ali, Mehmed b. Şa‘ban, Veli b. İsmail, Abdi b. Pîrî, Salih b. Hüseyin, Mehmed b. Sinan, Ahmed b. Abdullah.