Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 570 Hüküm no: 514 Orijinal metin no: [165b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na intikal eden Murat Paşa mahallesindeki evin İbrahim Çelebi b. Ahmed’e kiraya verilmesi Dârü’l-hilâfeti’l-aliyye Kostantıniyyetü’l-mahmiye’de vâki‘ Haremeyn-i Muhteremeyn Evkāfı’na bi’l-fi‘il mütevellî olan fahrü’l-emâsil ve’l-ekârim İsmail Ağa b. Mehmed Çelebi meclis-i şer‘-i şerîf-i lâzımü’t-tevkīrde hâfızü hâze’l-kitâb İbrahim Çelebi b. Ahmed mahzarında ikrâ[r] edip mahrûsa-i mezbûre mahallâtından Murad Paşa mahallesinde sâkine olup bundan akdem vefât eden sâhibetü’l-hayrâtdan Hadice bt. Abdülmennan nâm hatun tasarrufunda olan emlâkinden mahalle-i mezbûrede vâki‘ bir tarafı Mukāta‘acı Mustafa Çelebi mülkü ile ve bir tarafı kendi mülkü ile ve bir tarafı Cevher Ağa Vakfı ile ve taraf-ı âharı tarîk-i âm ile mahdûd olup bir bâb beyt-i ulvî ve bir bâb beyt-i süflî ve iki sofayı ve ahır ve muhavvatayı müştemil olan menzilini vakf edip süknâsını evvelâ kendüne ba‘dehâ İskender b. Abdülmennan ve İbrahim b. el-Hâc Mahmud ve Nasuh b. Abdülmennan nâm kimesnelere ba‘de vefâtihim evlâdına ba‘de’l-inkırâz Medîne-i Münevvere fukarâsına şart ve ta‘yîn ettiği vakfiyesinde mastûr olmağın hâlâ meşrûtün-aleyhâ olanlardan ferd kalmayıp menzil-i merkūmu âhara îcâr lâzım geldikde beyne’t-tâlibîn müzâyede olunup ragabât-ı nâs inkıtâ‘ından sonra mezbûr İbrahim Çelebi üzerinde otuz bin akçe icâre-i mu‘accele ve beher mâh on beş akçe icâre-i müeccele ile karâr edip ziyâde ile tâlib-i âhar zuhûr etmemekle ben dahi vech-i meşrûh üzere îcâr edip icâre-i mu‘accelesi olan meblağ-ı mezbûr otuz bin akçeyi mezbûr İbrahim Çelebi yedinden taraf-ı vakf için bi’t-tamâm ahz u kabz edip tasarrufuna izin verdim dedikde gıbbe’t-tasdîk vicâhen mâ-hüve’l-vâkı‘ kayd şüd. Tahrîren fi’l-yevmi’s-sânî ve’l-ışrîn min-âhiri’r-rebî‘ayn li-sene tis‘a ve selâsîn ve elf. Şühûdü’l-hâl: Fahrü’l-eimme Muharrem el-Hatîb, Fahrü’l-kuzât Ahmed Efendi b. Hasan, Mustafa Çelebi b. Abdülmennan el-Kâtib, Zahrü’l-akrân Yusuf Ağa el-Müteferrika, Ali Bey b. Abdülmennan el-Bevvâb.