Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 571 Hüküm no: 515 Orijinal metin no: [165b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Oruç Ağa’ya babasından intikal eden vakıf evin Dergah-ı Âlî müteferrikalarından Mehmed Ağa’ya kiraya verilmesi Budur ki, vilâyet-i Rumeli’nde vâki‘ kasaba-i Mudaniş sâkinlerinden Mehmed Çelebi b. el-merhûm Oruç Ağa kendi tarafından asâleten ve li-ebeveyn karındaşı Ahmed Çelebi tarafından dahi husûs-ı âti’l-beyâna vekîl olup kasaba-i mezbûre sâkinlerinden Ömer Bey b. Mehmed ve Hasan Bey b. Mehmed nâm kimesneler şehâdetleri ile vekâleti sâbite oldukdan sonra meclis-i şer‘-i şerîf-i lâzımü’t-tevkīrde bundan akdem sadrâzam iken vefât eden merhûm Ali Paşa’nın sulbî oğlu olup Dergâh-ı Âlî -lâ-zâle mahfûfen bi’l-me‘âlî- müteferrikalarından olan fahrü’l-emâcid ve’l-ekârim Mehmed Ağa nâm sagīrin savb-ı şer‘den mansûb vasîsi olan fahrü’l-ekâbir Murad Ağa b. Ramazan nâm kimesne mahzarında ikrâr-ı tâm ve takrîr-i kelâm edip mahmiye-i İstanbul’da Cezerî Kasım Paşa mahallesinde vâki‘ bir tarafı Haydar b. Abdülmennan mülkü ile ve bir tarafı İlyas Dede zâviyesi ile tarafeyn-i âhareyni tarîk-i âm ile mahdûd muhavvata-i dâhiliyyesi bir bâb beyt-i süflî ve iki bâb beyt-i ulvî ve bir kîlâr ve hamâmı muhtevî olup ve muhavvata-i hâriciyyesi iki bâb beyt-i ulvî ve bir ahır ve bi’r-i mâ ve iki kenîfi müştemil olup nısfı Haremeyn-i Şerîfeyn Vakfı’ndan ve nısf-ı âharı medîne-i Ebî Eyyüb el-Ensârî’de Takyecibaşı merhûm Ca‘fer Ağa Vakfı’ndan olan menzil icâre-i mu‘accele ve müeccele ile babam merhûm Oruç Ağa’nın taht-ı icâresinde olup fevt oldukda biz âhar diyârda olmağla [166a] menzil-i merkūm mahlûl olup vakfeyn-i merkūmeyne âid olmak zu‘mu ile menzil-i mezbûrun nısfını sâbıkā Haremeyn-i Şerîfeyn Evkāfı’na mütevellî olan Ali Çelebi b. Mehmed yevmî iki akçe ücret-i müeccele ve kırk beş bin akçe icâre-i mu‘accele ile ve nıfs-ı âharını dahi sâlifü’z-zikr Takyecibaşı Vakfı’na mütevellî olan Hüsameddin b. Abdurrahman yine yevmî iki akçe ücret-i müeccele ve otuz beş bin akçe icâre-i mu‘accele ile vasiyy-i merkūm Murad Ağa’ya îcâr ve ol dahi bi’l-vesâye mersûm Mehmed Ağa için istîcâr ve kabûl ettikden sonra biz dahi gelip merhûm Oruç Ağa babamız olup verâseti bize münhasıra olmağın menzil-i merkūmun tasarrufu bize intikāl etmişdir deyu da‘vâ ettiğimizde vasiyy-i merkūm Murad Ağa merhûm Oruç Ağa’nın sulbî oğlu olduğumu inkâr edip isbât sadedinde iken beynimize muslihûn tavassut edip es-sulhu hayrun fehvâsınca da‘vâ-yı menzil-i merkūmdan ferâğ etmek üzere elli beş bin nakd-i râyic fi’l-vakt fıddî akçe üzerine inşâ-i akd-i sulh ettiklerinde biz dahi sulh-ı mezbûru kabûl ve bedel-i sulh olan meblağ-ı mezbûr elli beş bin akçeyi vasiyy-i merkūm Murad Ağa yedinden tamâmen ahz u kabz edip husûs-ı mezbûra müte‘allik da‘vâdan zimmetlerini ibrâ ettim dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu. Tahrîren fî 15 min-şehri Ramazâni’l-mübârek li-sene semân ve selâsîn ve elf. Şühûdü’l-hâl: Abdülhalim Çelebi el-müderris, Mehmed Çelebi b. İbrahim, Abdullah Çelebi el-mülâzım, Ömer Efendi el-müsta‘id, Ali Bey b. Abdülmennan ve gayruhüm.