Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 572 Hüküm no: 516 Orijinal metin no: [166a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amine bt. Abdülmennan’ın süknası kendine şart olan vakıf evin yanması üzerine arsasını satarak binayı yeniden yaptırması Mahrûsa-i Kostantıniyye mahallâtından Mi‘mâr Kemal mahallesi sâkinlerinden olup bundan akdem vefât eden Ahras Ömer Ağa b. Abdullah nâm müteveffânın utekāsından Amine bt. Abdülmennan nâm hatun tarafından husûs-ı âti’l-beyâna vekîl olup Hasan Bey b. Abdullah ve Mehmed b. Hasan nâm kimesneler şehâdetleriyle vekâleti sâbite olan müvekkile-i mezbûrenin zevci fahrü’l-cüyûş Mustafa Çavuş b. Kenan meclis-i şer‘-i şerîf-i lâzımü’t-tevkīrde hâfızu hâze’l-kitâb Ahmed Efendi b. Rıdvan muvâcehesinde vekâleten ikrâr-ı tâm ve takrîr-i kelâm edip müteveffâ-yı mezbûr Ömer Ağa mahalle-i mezbûrede vâki‘ iki tarafı Handan Ağa mülkü ile ve iki tarafı tarîk-i âm ile mahdûd ulvâ ve süflâ büyût-ı müte‘addideyi müştemil olan menzilini vakf edip süknâsını evvelâ kendüye ba‘dehû utekāsından zevcem mezbûre Amine Hatun’a ve evlâdına ba‘de’l-inkırâz Haremeyn-i Muhteremeyn fukarâsına şart etmiş iken menzil-i merkūm bi’l-külliye muhterik olup bir vechile kābil-i süknâ olmayıp ve müvekkilem mezbûre Amine Hatun’un süknâya kemâl mertebe ihtiyâcı olduğundan mâ‘adâ binâya kudreti olmamağın menzil-i merkūma mülâsık tûlen on yedi zirâ‘ ve arzen sekiz bi-hesâb-ı şatrancî yüz otuz altı zirâ‘ı hâvî muhterik olan ahır arsasını âhara îcâr ve bir mesken binâ etmek lâzım olmağın beyne’t-tâlibîn müzâyede olunup ragabât-ı nâs inkıtâ‘ından sonra mersûm Ahmed Efendi üzerinde on iki bin akçe icâre-i mu‘accele ve beher şehr beşer akçe icâre-i müeccele ile karâr edip ziyâde ile tâlib-i âhar zuhûr etmeyip ve binâsına sarf ettiği icâre-i mu‘accelesine mahsûb olmak üzere râgıb olmağın müvekkilem mezbûre Amine Hatun dahi meşrûtası olduğu hasebi ile arsa-i mezbûreyi evkāf-ı merkūme mütevellîsi ma‘rifeti ile mezbûr Ahmed Efendi’ye vech-i merkūm üzere îcâr edip ol dahi istîcâr ve kabûl ettikden sonra icâre-i mu‘accelesi olan meblağ-ı mezbûr on iki bin akçeyi yedinden ahz u kabz edip ve ücret-i müeccelesi olan beher mâh beşer akçeyi dahi müvekkilem mezbûre Amine Hatun kabz edip ba‘de vefâtihâ evkāf-ı mezbûre mütevellîleri kabz etmek üzere arsa-i mezbûrenin tasarrufuna izin verdi dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb ve terkīm olundu. Fî-evâhiri âhiri’r-rebî‘ayn li-sene tis‘a ve selâsîn ve elf. Şühûdü’l-hâl: Abdullah Efendi, İsmail Efendi b. Mustafa el-imâm, Mehmed Ağa b. Handan el-cündî, Abdullah b. Mustafa el-müezzin, Yunus Efendi b. Handan, Ahmed b. Hasan ve Ali Çelebi b. Halil ve gayruhüm.