Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 574 Hüküm no: 518 Orijinal metin no: [167a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi İsmail Çelebi b. Mehmed’in Recep Ağa b. Mehmed’e ait mülk bostanın vakıf olduğu iddiası Mahrûsa-i İstanbul’da vâki‘ Haremeyn-i Şerîfeyn Evkāfı’na bi’l-fi‘il mütevellî olan fahrü’l-emâsil ve’l-ekârim İsmail Çelebi b. Mehmed meclis-i şer‘-i şerîf-i lâzımü’t-tevkīrde sâbıkā Toparabacıları ağası olup bostan-ı âti’l-beyâna vâzı‘ü’l-yed olan zahrü’l-akrân hâfızü hâze’l-kitâb Receb Ağa b. Mehmed mahzarında takrîr-i da‘vâ edip mahrûsa-i mezbûre mahallâtından Âşıkpaşa mahallesi sâkinelerinden olup bundan akdem vefât eden Kamer Hatun bt. Hüseyin Efendi nâm müteveffât tasarrufunda olan emlâkinden mahmiye-i Galata tevâbi‘inden Kasımpaşa mahallâtından Piyalepaşa Mescidi mahallesinde vâki‘ bir tarafı Hüseyin Ağa veresesi mülkleriyle ve bir tarafı el-Hâc Sefer veresesi mülkleriyle ve bir tarafı Abdülkerim Çelebi veresesi mülkleriyle ve bir tarafı vâdî ve taraf-ı âharı tarîk-i âm ile mahdûd olup eşcâr-ı müsmire ve gayr-ı müsmireyi ve üç aded bi’r-i mâyı ve iki bâb odayı müştemil olan bostanını hâl-i sıhhatinde bin yirmi altı senesi Rebî‘ülevveli’nin evâilinde vakf edip tasarrufunu evvelâ kendi nefsine ba‘de vefâtihâ Haremeyn-i Şerîfeyn fukarâsına şart ettiği yedimde olan sûret-i vakfiyesinde mastûr olmağla mezbûre Kamer Hatun vefât edip bostan-ı mezkûr tevâbi‘i ile cânib-i vakf-ı şerîfe âid olmuş iken mezbûr Receb Ağa bî-vech-i şer‘î tasarruf eder, savb-ı şer‘-i kavîmden üzerine varılıp vak‘a bî-garaz Müslümânlardan istihbâr ve ihkāk-ı hak kılınması matlûbumdur dedikde cânib-i şer‘-i şerîfden Mevlânâ Ali Efendi irsâl olunup ol dahi zeyl-i kitâbda mastûrü’l-esâmî Müslimîn ile mahall-i mezbûra varıp akd-i meclis ve ve mütevellî-i merkūm İsmail Çelebi’nin yedinde olan sûret-i vakfiyeyi feth ve mezbûr Receb Ağa mahzarında karâr edip suâl ettiklerinde mezbûr Receb Ağa cevâbında zikr olunan bostanı müteveffât-ı mezbûre Kamer’den bin otuz iki senesinde mülkiyyet üzere seksen bin nakd-i râyic fi’l-vakt akçeye iştirâ edip tasarruf üzere iken hâricden Ramazan b. Ahmed nâm kimesne da‘vâ-yı istihkāk edip kable’l-isbât tavassut-ı muslihîn ile otuz beş bin akçeye sulh olup vech-i merkūm üzere iki vechile mülküm olduğuna târîh-i mezbûrda mahmiye-i Galata kādısı olan ekremü’l-mevlâ merhûm Abdülkerim Efendi imzâsı ile mümzâ ve mahtûm yedimde hüccet-i şer‘iyyem vardır deyu mazmûn-ı vakfiyeyi bi’l-külliye münkir olup müdde‘î-i mersûmdan beyyine taleb olundukda ityân-ı beyyineden izhâr-ı acz edip vâki‘ hâl ahâlî-i mahalle-i mezbûre ve gayrıdan istihbâr olunsun deyicek, husûs-ı mezbûra vukūfu olan Müslimînlerden kıdvetü’s-sâlihîn umdetü’l-vâsılîn eş-Şeyh Ali Efendi b. Dede Bey ve el-Hâc Mustafa b. Mehmed el-müezzin ve İbrahim b. Şa‘ban ve sâir cemm-i gafîr hâzırûn fi’l-meclis olup müteveffât-ı mezbûre Kamer Hatun hâl-i hayâtında târîh-i mezbûrdan zikr olunan bostanı tevâbi‘i ile müşterî-i mezbûr Receb Ağa’ya bizim huzûrumuzda meblağ-ı mezbûr seksen bin akçeye bâtten bey‘ edip kabz-ı semen ve teslîm-i mebî‘ ettikden sonra hâricden mezbûr Ramazan b. Ahmed da‘vâ-yı istihkāk edip isbât sadedinde iken tavassut-ı muslihîn ile bi’l-külliye da‘vâdan ferâğ etmek üzere otuz beş bin akçeye inşâ-i akd-i sulh ve herbiri sulh-ı mezbûru kabûl ve bedel-i sulh olan meblağ-ı mezbûr otuz bin akçeyi mezbûr Ramazan menzil-i [müşterî-i] merkūm Receb Ağa yedinden bi’t-tamâm ahz u kabz ve zimmetini ibrâ etmişdir, vech-i merkūm üzere bostan-ı mezkûr tevâbi‘i ile mârru’z-zikr Receb Ağa’nın mülkü olduğuna şâhidleriz ve şehâdet-i şer‘iyye dahi ederiz deyip mütevellî-i mezbûr İsmail Çelebi mahzarında edâ-i şehâdet-i şer‘iyye ettiklerini mevlânâ-yı mezbûr mahallinde tahrîr ve ba‘dehû meclis-i şer‘de inhâ ve takrîr ettikden sonra mütevellî-i mezbûr mu‘ârazadan men‘ olunup mâ-hüve’l-vâkı‘ bi’t-taleb ketb olundu. Fî-evâhiri şehri Rebî‘i’l-âhir li-sene tis‘a ve selâsîn ve elf. Şühûdü’l-hâl: Fâhrü’s-sâdât es-Seyyid Kasım Efendi, İbrahim Efendi b. Şekib, Mustafa Efendi b. Hüsam, Yahya Efendi b. Abdülkerim, İslam Ağa b. Mehmed, es-Seyyid Ali Çelebi b. ( ) el-cündî, Ataullah Çavuş b. Nasuh, Ahmed Efendi b. Ömer el-müderris, Mustafa Efendi b. Hanefi, Ahmed b. Ahmed el-cündî, Mehmed Bey b. Mustafa el-cündî, Hasan Bey b. Abdullah el-bevvâb, Hasan Çelebi b. Hüseyin el-mi‘mâr ve gayruhüm.