Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 576 Hüküm no: 519 Orijinal metin no: [167a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi İsmail Çelebi’nin Sinan b. Abdullah tarafından vakfedilen evi teslim alması Mahrûsa-i Kostantıniyye’de vâki‘ Haremeyn-i Muhteremeyn Evkāfı’na bi’l-fi‘il mütevellî olan fahrü’l-emâcid ve’l-ekârim İsmail Çelebi b. Mehmed meclis-i şer‘-i şerîf-i lâzımü’t-tevkīrde gelip takrîr-i kelâm edip mahmiye-i mezbûre mahallâtından Defterdâr Ahmed Çelebi mahallesi sâkinlerinden olup bundan akdem vefât aden sâhibü’l-hayrât Sinan b. Abdullah nâm müteveffâ hâl-i sıhhatinde tasarrufunda olan emlâkinden mahalle-i mezbûrede vâki‘ bir tarafı Müstedâm Çavuş Vakfı ile ve bir tarafı Ayni Hatun mülkü ile ve bir tarafı Âişe bt. Muharrem mülkü ile ve taraf-ı âharı tarîk-i âm ile mahdûd olan menzilini vakf edip süknâsını evvelâ kendüye ba‘dehû zevcesi Kaya Hatun bt. İlyas nâm Hatuna şart edip anın vefâtından sonra Haremeyn-i Şerîfeyn fukarâsına ta‘yîn ettiği yedimde olan vakfiyesinde mastûr olmağın hâlâ zevcesi mezbûre Kaya Hatun dahi vefât edip meşrûtün-aleyhâ kimesne kalmamağla menzil-i merkūm taraf-ı vakf-ı şerîfe âid olmuşdur, savb-ı şer‘den üzerine varılıp arsası mesâha ve müştemilâtı müşâhede olunup mâ-vaka‘a tahrîr olunmak matlûbumdur dedikde kıbel-i şer‘den Mevlânâ Mustafa Efendi irsâl olundukda ol dahi mi‘mârân-ı hâssadan Üstâd Ali Çelebi b. Halil nâm mi‘mâr ve zeyl-i kitâbda mastûrü’l-esâmî olan Müslimîn ile menzil-i merkūmun üzerine varıp mesâha eylediklerinde tûlen yirmi zirâ‘ ve arzen dokuz bi-hesâb-ı şatrancî yüz doksan zirâ‘ arsa üzerinde mebnî bir bâb beyt-i ulvî ve tahta-pûşu ve tahtında bir bâb dükkânı ve hadîka ve kenîf ve muhavvatayı müştemil olduğunu mevlânâ-yı mezbûr mahallinde tahrîr edip ba‘dehû meclis-i şer‘de inhâ ve takrîr ettikden sonra mâ-hüve’l-vâkı‘ bi’t-taleb ketb olundu. Fi’l-yevmi’s-sâlis ve’l-ışrîn min-evveli’l-cemâzeyn li-sene tis‘a ve selâsîn ve elf. Şühûdü’l-hâl: Fahrü’l-akrân Mehmed Ağa, Fahrü’l-eimme Şa‘ban Efendi, Mehmed Çelebi b. Halil Efendi el-müezzin, Mehmed b. Mehmed Mehter, Hasan b. Ahmed, Hasan Çelebi b. Ömer, Mustafa b. Şa‘ban ve gayruhüm.