Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 578 Hüküm no: 521 Orijinal metin no: [167b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarayda helvacı olan Mehmed Beşe’nin denizde boğulması üzerine kardeşi Ali’nin terekesini almak istemesi Vilâyet-i Anadolu’da vâki‘ kasaba-i Koyuluhisarı sâkinlerinden hâfızü hâze’l-kitâb Ali b. Ca‘fer nâm kimesne meclis-i şer‘-i şerîf-i lâzımü’t-tevkīrde Sarây-ı Cedîd-i Sultânî -dâme medâru’l-emn ve’l-emânî-’de sâkin helvacıyân-ı hâssa zümresinden olup mahrûsa-i Galata tevâbi‘inden Fındıklı demekle ma‘rûf mahalde garîk-i bahr olan Mehmed Beşe b. Ca‘fer nâm müteveffânın alâ-tarîkı’l-emâne muhallefâtına vâzı‘ü’l-yed olup Atebe-i aliyye-i seniyyede Dârüssaâde ağası olan iftihârü’l-havâs ve’l-mukarrebîn mu‘temedü’l-mülûk ve’s-selâtîn sâhibü’l-izzi ve’t-temkîn el-muhtassu bi-mezîdi inâ[yeti]’l-meliki’l-mu‘în hazret-i Derviş Ağa b. Abdülkerim huzûr-ı âlîlerinde takrîr-i da‘vâ edip mahalle-i mezbûrede garîk-i bahr olan li-ebeveyn karındaşım müteveffâ-yı mezbûr Mehmed’in verâseti bana münhasıra olmağın ağa-yı mûmâ-ileyh -lâ-zâle beyne’l-enâm- müşârun-ileyh hazretleri yedlerinde emânet vaz‘ ettiği kalîl ve kesîr esvâbı bi-hasebi’l-irsi’ş-şer‘î bana intikāl etmişdir, taleb ederim, teslîmden imtinâ‘ eder, suâl olunup ihkāk-ı hak olunmak matlûbumdur deyicek, gıbbe’s-suâl müşârun-ileyh ağa hazretleri cevâbında mezbûr Mehmed gider oldukda levni ve vasfı beynimizde ma‘lûm bana bazı esvâb emânet vaz‘ edip revân olmuş idi, lâkin vech-i merkūm üzere garîkan vefât ettiği ma‘lûmum değildir deyu münkir olup müdde‘î-i mezbûrdan takrîrine mutâbık beyyine taleb olundukda udûl-ı Müslimînden cebeciyândan yirmi beşinci bölükde Bıyıklı demekle ma‘rûf Mehmed Beşe b. Veli ve kırk beşinci ağa bölüğünde Davud Beşe b. Mustafa nâm râcil li-ecli’ş-şehâde meclis-i şer‘a hâzırân olup münkir-i mûmâ-ileyh ağa hazretleri mahzarında gıbbe’l-istişhâdi’ş-şer‘î edâ-i şehâdet-i şer‘iyye edip fi’l-vâki‘ müdde‘î-i mezbûr Ali Bey li-ebeveyn karındaşı olup Sarây-ı Cedîd-i Sultânî helvacıları zümresinden olan Mehmed Beşe nâm müteveffâ Fındıklı demekle ma‘rûf mahalde garîkan vefât edip sâhil-i deryâda meyyitini müşâhede edip defn ettik, vech-i merkūm üzere mersûm Mehmed Beşe’nin vefâtı mütehakkık olduğuna şâhidleriz ve şehâdet dahi ederiz dediklerinde ba‘de’t-ta‘dîl ve’t-tezkiyye mezbûrânın şehâdetleri hayyiz-i kabûlde mâ-vaka‘a olundukdan sonra mûcebiyle hükm olunup hüve’l-vâki‘ bi’t-taleb ketb olundu. Fî-evâsıtı evveli’l-cemâzeyn li-sene tis‘a ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Fahrü’l-akrân Receb Ağa b. Mehmed, Fahrü’l-müderrisîn Halil Efendi b. Mahmud, Abdülhalim Çelebi b. Mehmed el-müderris, Ali Bey b. Abdülmennan el-bevvâb.