Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 583 Hüküm no: 526 Orijinal metin no: [169a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi İsmail Çelebi’nin Öksüz mahallesinden Selime Hatun tarafından vakfedilen evi teslim alması Haremeyn mütevellîsi İsmail Çelebi b. Mehmed meclis-i şer‘de takrîr-i kelâm edip mahmiye-i İstanbul’da Öksüz mahallesinde sâkine iken vefât eden merhûme Selime Hatun mahalle-i mezbûrede vâki‘ bir tarafdan Piyale bt. Abdullah mülkü ve bir tarafdan Kādı evleri demekle ma‘rûf menzil ve iki tarafdan tarîk-i âm ile mahdûd tahtânî ve fevkānî iki beyti müştemil menzilini vakf edip süknâsını evvelâ nefsine ba‘dehâ utekāsına ba‘de’l-inkırâz Haremeyn fukarâsına şart edip meşrûtün-lehüm bi’l-külliye münkarız olmağla menzili- mezbûr cânib-i vakfa âid olmuşdur, cânib-i şer‘den üzerine varılıp ba‘de’l-mu‘âyene keşf ve tahrîr ve mesâha olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i kitâbda isimleri mastûr olan Müslimîn ile üzerine varıp mu‘âyene ve mesâha eylediklerinde bennâ zirâ‘ı ile tûlen on ve arzen sekiz bi-hesâb-ı şatrancî seksen zirâ‘ arsa üzerine mebnî menzil-i mezbûru mu‘âyene eylediklerinde mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Tahrîren fî-evâsıtı Recebi’l-ferd li-sene tis‘a ve selâsîn ve elf. Şühûdü’l-hâl: Mustafa Çelebi el-kâtib, İbrahim Çelebi b. Mustafa el-bevvâb, Dilaver Bey b. Abdullah el-bevvâb, Ali Bey b. Abdullah.