Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 590 Hüküm no: 531 Orijinal metin no: [173a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevkufatî Zülfikar Efendi’nin ev vakfiyesinde birtakım değişiklikler yapması El-hamdü li-veliyyihî ve’s-salâtu alâ-nebiyyihî ve alâ-âlihî ve ashâbihî ecma‘în, ammâ ba‘d, işbu kitâb-ı vakf-ı sahîhin sâhibi sâhibü’l-hayrât ve’l-hasenât Zülfikār Efendi b. Abdüddeyyan hilâl-ı sütûrda mastûr olan şurût ve kuyûdun tebdîl ü tağyîr ve taklîl ü teksîr ve tevliyetini hayâtda kaldıkça kendüye şart eylediği şer‘an sâbit olmağın vâkıf-ı mezkûr meclis-i şer‘-i şerîf-i lâzımü’t-teşrîfde vakf-ı mezbûra mütevellî olan Hürrem Bey mahzarında takrîr-i kelâm ve bast ani’l-merâm edip kitâb-ı merkūmda musarrah ve mersûm olup Ayasofya-i Kebîr mahallesinde vâki‘ hudûd ve müştemilâtı beyân olunan menzil silk-i mülk-i sahîhimde iken bundan akdem sene ihdâ ve selâsîn ve elf Şa‘bânü’l-mu‘azzamı evâsıtında vakf-ı sahîh-i şer‘î ile vakf ve habs ettiğimden sonra menzil-i merkūmda evvelâ kendim ba‘dehû evlâdım ve evlâd-ı evlâdım sâkin olup ba‘de’l-inkırâz utekām ve evlâd-ı utekām ve evlâd-ı evlâd-ı evlâd-ı utekām sâkin olup ba‘de’l-inkırâz ücreteyn ile îcâr olunup hâsıl yevmî beş akçe vazîfe-i mu‘ayyeneden mâ‘adâsının nısfı fukarâ-i Haremeyn-i Muhteremeyn’e verilip nısf-ı âharı dahi zikri âtî masrafa sarf oluna ve ücret-i mu‘accelesinin dahi kezâlik nısfı fukarâ-i Haremeyn’e verilip nısf-ı âharı ile müştimilât-ı menzil-i merkūmdan zikr olunan ahır-ı kebîrin fevkinde mevcûde olan ebniye kal‘ olundukdan sonra tûlen on ve arzen yedi bi-hesâb-ı şatrancî yetmiş zirâ‘ arsası üzerine iki bâb tahtânî ocaklı oda binâ olunup evlâd-ı Arabdan iki nefer süknâya muhtâc a‘mâ herbir odada bilâ-icâre sâkin olup mukābelesinde herbiri küllü yevm üç ihlâs-ı şerîf tilâvet edip sevâbını ruhûma ihdâ edeler ve zikr olunan odalar binâsından fazla kalan akçenin nısfı mezkûr olan a‘mâlara ale’s-seviyye taksîm olunup nısf-ı âharı mütevellî yedinde hıfz ve odaların lâzım gelen binâ ve meremmetine sarf oluna ve menzil-i merkūmun icâre-i müeccelesinin nısfı bâlâda mezkûr olduğu üzere fukarâ-i Haremeyn’e ve nısf-ı âharının nısfı dahi zikr olunan a‘mâlara verilip nısf-ı âharı yine mütevellî yedinde hıfz ve odaların meremmetine sarf oluna ve menzil-i merkūmun tevliyyeti mahmiye-i merkūmede vâki‘ serrâcbaşı demekle ma‘rûf Hasan Çelebi Vakfı’na mütevellî olan kimesneye meşrût ola deyu şart ve ta‘yîn etmiş idim, el-hâletü hâzihî şurût-ı mezkûremi tebdîl ve tağyîr murâdım olmağla zikr olunan odalar binâsından udûl edip menzil-i merkūmdan cümle hudûd ve müştemilâtı ile bi-rimmetihâ evvelâ kendim ba‘dehû evlâdım sâkin olup ba‘de’l-inkırâz ümm-i veledim olan hürretü’l-asl Saliha bt. Abdullah ve evlâdı sâkin olalar, ba‘dehüm Eflakiyyü’l-asl müdebberim Yusuf b. Abdullah ve evlâdı sâkin olalar, ba‘dehüm menzil-i merkūm îcâr olunup hâsıl olan icâresinden vakfiyede ta‘yîn olan yevmî beş buçuk akçe vazîfe ashâbına verildikden sonra fazla kalan icâre sâir utekām beynlerinde ale’s-seviyye kısmet oluna ve ba‘de inkırâzihim menzil-i merkūmun icâresinin vazîfe-i merkūmeden mâ‘adâ her sene surre ile fukarâ-i Haremeyn’e irsâl oluna ve menzil-i merkūmun meremmet-i lâzımesini nevbetinde sâkin olanlar kendi mâllarından imâret ve meremmet ettiklerinden sonra herbiri nevbetinde sâkin iken menzil-i merkūmun ücretinden surre ile her sene Medîne-i Münevvere fukarâsına dört sikke-i hasene irsâl edeler ve menzil-i merkūmun tevliyyetini yevmî bir buçuk akçe vazîfe ile utekāmın aslahına şart ve ta‘yîn eyledim dedikde ba‘de’t-tasdîki’ş-şer‘î sıhhat-i tağyîr ve şurût-ı mezkûreye hüküm olunup mâ-hüve’l-vâkı‘ ketb olundu. Hurrire fî-evâili şehri Ramazâni’l-mübârek sene sitte ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Düstûr-ı mükerrem müşîr-i müfehham Kapudan Hasan Paşa, umdetü’l-emâcid ve’l-ekârim Abdülfettah Ağa b. ( ) ez-za‘îm, umdetü’l-a‘yân Hüseyin Ağa b. ( ) Kethüdâ-i Kapudân, Mustafa Efendi b. Hüseyin el-müderris, Mehmed Ağa Birâder-i Hâfız Paşa merhûm, Hasan Efendi b. Mehmed el-kâtib, Mehmed Ağa b. Mustafa Muhzırbaşı, umdetü’l-küttâb Osman Efendi el-kâtib, umdetü’l-ekâbir ve’l-e‘âlî Ali Ağa b. ( ) ser-zağracıyân.